Baseli të shtunën fitoi 1:0 në udhëtim ndaj Sionit, në kuadër të xhiros së pestë të Superligës së Zvicrës. Xherdan Shaqiri asistoi në golin e shënuar nga Junior Ze në minutën e 14-të.
Te Baseli startuan Shaqiri e Albian Ajeti, ndërsa te Sioni luajtën Benjamin Kololli e Rilind Nivokazi.
Dhe Kololli i është kthyer një rasti të vjetër, sa ishte te Baseli.
Në fillim të edicionit të kaluar, Benjamin Kololli e Thierno Barry u larguan nga skuadra për ndeshjen kundër Luganos. Ata ishin pjesë e një grupi prej shtatë personash që kishin qëndruar vonë në një klub gjatë javës.
Të gjithë ishin gjobitur më pas.
Nuk vonoi shumë dhe Kololli u largua nga Baseli. Tani ish-reprezentuesi i Kosovës ka bërë akuza të rënda ndaj klubit kampion të Zvicrës.
Ka thënë se nuk pendohet dhe se Baseli kishte gabuar.
“E gjitha filloi në një mbrëmje ekipore të organizuar nga Baseli, vetëm tri ditë para fillimit të edicionit. Duhet të presësh që lojtarët do të largohen më vonë. Sigurisht që ishte e lehtë për klubin të thoshte që lojtarët që janë larguar ishin fajtorë. Por unë mendoj se Baseli ishte fajtor që e organizoi atë mbrëmje. Asnjë ekip tjetër profesional nuk do ta bënte atë në atë moment”, ka thënë Kololli për “Basler Zeitung”.
Ai ka insistuar se Baseli është fajtor dhe se në klub është dashur ta dijnë se disa lojtarë do të largohen nga darka e organizuar prej klubit.
“Morëm një apo dy pije dhe u larguam për në shtëpi në një të natës. Fjalët se kemi festuar gjithë natën nuk janë të vërteta. Por Baseli kishte gjetur tashmë fajtorin e tij. Unë them se Baseli ishte fajtor që e organizoi festën në atë kohë”, ka theksuar Kololli.