Klubi gjerman mbron vendimin për të mos blerë lojtarin nga Izraeli

Kryetari i Fortuna Dusseldorfit ka mbrojtur vendimin e klubit gjerman të futbollit për t’u tërhequr nga blerja e lojtarit izraelit, Shon Weissman, pasi reagimeve të tifozëve për postimet e tij kundërthënëse në rrjetet sociale në lidhje me Gazën. Ai tha se të akuzohet klubi për antisemitizëm është absurde.

Dusseldorfi njoftoi gjatë javës së nuk do të nënshkruante me 29-vjeçarin Weissman, pavarësisht se kishte qenë në negociata të avancuara. Ai pritej të transferohej nga Granada spanjolle.

Por tifozët e Dusseldorfit kundërshtuan lëvizjen për shkak të postimeve të tij në rrjetet sociale, që shprehnin mbështetje për veprimet e Izraelit në Gaza. Llogaria e Weissmanit u kthye në “private” të shtunën.

Fillimisht Fortuna Dusseldorfi nuk njoftoi pse kishte anuluar transferimin. Por më pas lëshoi komunikatë tjetër duke thënë se “deklaratat e Weissmanit në rrjetet sociale dhe trajtimi i mëvonshëm i tyre nuk ishin në përputhje me vlerat tona”.

Presidenti i klubit, Klaus Allofs ka mbrojtur vendimin e klubit. Por ka thënë se një vendim më i shpejt do të ishte i mirëseardhur.

“Nuk do të thosha që është gabim. Ne kemi dashur të nënshkruajmë me një lojtar dhe mendoj se kjo është legjitime. Është pjesë e vlerave tona që mos të limitojmë veten dhe që të mos përjashtojmë gjëra nga fillimi”, ka thënë Allofs.

Allofs tha se klubi qëllimisht priti të konsultohej me anëtarët e komunitetit hebre në Dusseldorf përpara se të vendoste kundër transferimit.

I pyetur në lidhje me akuzat për antisemitizëm, Allofs tha: “Është absurde për ta thënë troç”.

Weissman kishte munguar të paktën në një ndeshje në Spanjë për shkak të brengave për sigurinë e tij. Autoritetet ishin shqetësuar për atmosferë potencialisht armiqësore të krijuar nga tifozët e Osasunas, të zemëruar nga postimet e Weissmanit në rrjetet sociale.