Kameruni ka nisur një “luftë” me presidentin e Federatës së Futbollit, Samuel Eto’o, vetëm pak ditë para fillimit të Kupës së Afrikës.
Eto’o, i cili të enjten e shënoi vitin e katërt si president i futbollit kamerunas, ka pasur mosmarrëveshje me përzgjedhësin Marc Brys, i cili raportohet se po e refuzon shkarkimin.
Përzgjedhësi belg ende nuk është shkarkuar zyrtarisht dhe ka kontratë me Ministrinë e Sportit deri në shtator të vitit 2026, ndonëse i është thënë nga Eto’o se koha e tij te Kameruni ka mbaruar.
Kjo mosmarrëveshje që është përcjellë me tone të ashpra e ka futur Kamerunin në kaos dhe konfuzion pak ditë para nisjes së turneut, pasi gjiganti afrikan ka dërguar në AFCON dy lista të ndryshme të lojtarëve.
Federata e Kamerunit, e udhëhequr nga Eto’o, ka publikuar listën me 28 futbollistë pas takimit emergjent të komitetit më 1 dhjetor, duke e emëruar David Pagoun si selektor, dhe jo Brysin, për këtë turne.
Edhe
Qeveria e Gabonit heq sanksionet ndaj përfaqësueses dhe Aubameyangut
Pagou, tani është zyrtarisht në faqen zyrtare të FIFA-s si përzgjedhës, ndërsa ka mbajtur edhe konferencë për shtyp javën e kaluar, për të dhënë shpjegime për listën dhe ambiciet e Kamerunit. Ai është paraqitur bashkë me ndihmësit, të cilët po ashtu i ka vendosur Eto’o.
Në listë pati shumë befasi, pasi ishin lënë jashtë ish-portieri i Manchester Unitedit, Andre Onana, ish-sulmuesi i Bayern Munichut, Eric Choupo-Moting dhe golashënuesi veteran, Vincent Aboubakar.
Sipas burimeve të “The Sun”, lënia jashtë e Aboubakarit është bërë me urdhër të Eto’os, pasi i rrezikohej rekordi si golashënuesi më i mirë në histori të Kamerunit.
33-vjeçari Aboubakar është vetëm 12 gola larg për t’u bërë golashënuesi më i mirë i Kamerunit dhe kjo do të mund të arrihej në Kupën e Afrikës në javët e ardhshme.
“Nga minuta e parë, ai më ka fyer dhe unë kam reaguar. Isha si konkurrencë për të. Eto’o ka lënë jashtë lojtarë dhe liderë të skuadrës. Sepse, natyrisht, ai e ka bërë këtë selektim. Si mund të shkosh në Kupën e Afrikës pa portier të klasit botëror? Apo pa Aboubakarin? Është e pabesueshme, por në fakt, nuk më ka befasuar. Kjo vjen nga dikush që është narcisist dhe mendon se është më i miri”, ka deklaruar Brys për “VTM Nieuës”.
44-vjeçari Eto’o për kohë të gjatë është duke luftuar me Brysin që ai të mos jetë përzgjedhës i Kamerunit.
Edhe
Eto’o fiton rastin në CAS, mund të zgjidhet president
Në vitin 2024, Eto’o ishte suspenduar nga FIFA dhe nuk kishte të drejtë që për gjashtë muaj t’i ndiqte ndeshjet e Përfaqësueses së Kamerunit, pasi kishte thyer dy nene të kodit disiplinor të shtëpisë botërore të futbollit.
Nuk janë dhënë detaje të hollësishme për këtë suspendim, por ato lidheshin me Kupën e Botës U20 për futbolliste, për ndeshjen Brazil – Kamerun.
