Gjigantët evropianë të futbollit, Arsenal, Chelsea, PSG, Bayern dhe Real Madridi, synojnë transferimin e talentit shqiptar, Adri Mehmeti.
Për interesimin e gjigantëve për 17-vjeçarin kanë raportuar mediume të ndryshme.
Shkrimet kushtuar Mehmetit janë rritur sidomos pas shkëlqimit kundër Inter Miamit të Lionel Messit.
“FussballDaten” i ka kushtuar shkrim të gjatë talentit që po shkëlqen në ligën MLS në Shtetet e Bashkuara të Amerikës.
Pas golit që e shënoi me New York Red Bullsin ndaj Inter Miamit të Lionel Messit, më 12 prill, Mehmeti luajti edhe tri ndeshje të tjera. Të fundit e pati të enjten ndaj DC Unitedit, në barazimin 4:4. Ai i ka edhe dy asistime në nëntë paraqitje.
“Arsenali dhe Chelsea po punojnë që ta sjellin futbollistin e ri e të talentuar, për ta përgatitur për ekipin e parë. Këto skuadra mund të luajnë rol në zhvillimin e Mehmetit”, ka shkruar “FussballDaten” për futbollistin shqiptar, i cili ka kontratë me klubin amerikan deri në fund të vitit 2028. Klubi po ashtu e ka opsionin për vazhdimin e kontratës së tij edhe për një vit tjetër.
Edhe
Messi në fushë, por goli e shkëlqimi janë për 17-vjeçarin Mehmeti
Mehmeti luajti për 65 minuta të enjten në ndeshjen e fundit.
Mediumi “Southwardcentral” e ka vlerësuar Mehmetin për pjekurinë dhe karakterin fitues.
“Pas ndeshjes, zhgënjimi dukej qartë në fytyrën e mesfushorit Adri Mehmeti. Edhe pse vetëm 17-vjeçar me nëntë paraqitje në ndeshjet në MLS, ishte e qartë se sa shumë kishte rëndësi kjo ndeshje për të”, ka shkruar ky medium.
Skuadra e Mehmetit krijoi epërsi prej dy golash në minutën e 52-të. Por më pas pranoi dy gola të shpejtë për 3:3. Skuadra e tij sërish kaloi në epërsi 4:3 në minutën e 71-të, por rezultati përfundimtar u vendos në minutën e 80-të.
Për shkak se New York Red Bulli nuk e ruajti epërsinë e krijuar, ka shkaktuar pakënaqësi te Mehmeti, i cili ka kërkuar më shumë përkushtim nga bashkëlojtarët.
“Ishim 3:1 dhe pësuam gol menjëherë pasi shënuam. Por mendoj se ka të bëjë me mentalitetin që të kthehemi sërish dhe të vazhdojmë dhe jo siç ndodhi që pranuam gola për 3:3. Nuk duhej të pranonim gola të tillë. Por gjërat dhe idetë tona mbesin të njëjta. Duhet të përmirësohemi, të bëjmë video-analizë dhe të jemi më të mirë në ndeshjen tjetër”, ka thënë Mehmeti.
Mediumi amerikan e ka vlerësuar Mehmetin për fjalët e zgjedhura pas barazimit. Ata kanë thënë se ka kualitete të liderit dhe flet sikur të ishte shumë më i vjetër se për moshën që e ka aktualisht.
“Duhet që të shohim para dhe të qëndrojmë të bashkuar e të luajmë lojë ekipore. Të luajmë në pjesën e kundërshtarit, ta kontrollojmë ndeshjen dhe ta kontrollojmë ritmin e lojës. Duhet të vazhdojmë dhe të fokusohemi në ndeshjen e radhës”, theksoi Mehmeti.
Edhe
MLS për Mehmetin: Perspektiva e përfaqësueses amerikane
New York Red bulli i ka 12 pikë pas nëntë ndeshjeve dhe zë vendin e tetë.
Mehmeti u lind në New York, ndërsa ka luajtur për grupmoshat U15 të Shqipërisë dhe SHBA-së. Rrjedhimisht e ka të drejtën të vendosë se cilin vend do ta përfaqësojë. Ai iu bashkua Akademisë së New York Red Bullit në vitin 2019.
