Barcelona do të udhëtojë në fundjavë në San Sebastian për të luajtur ndaj Real Sociedadit në ndeshjen e xhiros së 13-të të La Ligas.
“Blaugrana”, e drejtuar nga trajneri Hansi Flick, do të hyjë në këtë ballafaqim pas fitores së thellë 5:2 në Ligën e Kampionëve në Beograd ndaj Crvena Zvezdës.
Kjo nuk ishte fitorja e vetme e thellë së fundmi nga Barcelona.
Lojtarët e udhëhequr nga trajneri gjerman kanë shënuar plot 16 gola në katër ndeshjet e fundit. Ndaj Realit, Barça fitoi 4:0.
Së fundi kanë shkëlqyer Raphinha dhe Robert Lewandowski.
Edhe
Barça luan te Girona, Reali pret Sociedadin
36-vjeçari Lewandowski ka 19 gola e dy asistime në 16 ndeshjet e këtij edicioni, ndërsa Raphinha ka 12 gola e 10 asistime.
Real Sociedadi u mposht në Ligën e Evropës në udhëtim nga Viktoria Plzeni, 2:1.
Ndeshja Sociedad – Barcelona zhvillohet të dielën nga ora 21:00 e mbyll këtë fundjavë të kampionatit spanjoll.
Barcelona është e para me 33 pikë, ndërsa Sociedadi ka 15 pikë.
Kampioni në fuqi, Real Madridi, ka mbetur me 24 pikë, por e ka një ndeshje më pak të luajtur. Osasuna ka tri pikë më pak.
Real Madridi të shtunën nga ora 14:00 luan pikërisht ndaj Osasunas.
Madrilenët në mesjavë pësuan humbje 3:1 nga Milani. Ajo humbje e pasoi disfatën turpëruese 4:0 në “Bernabeu” nga Barcelona.
Real Madridi është kritikuar shumë për mënyrën e lojës. Është vlerësuar se Reali po luan i paorganizuar në mbrojtje e sulm, ndërsa kjo ka ngritur dyshime nëse trajneri Carlo Ancelotti duhet të jetë ende në krye të ekipit.
Edhe
Barça kërkon ta shfrytëzojë krizën e Realit
Skuadra tjetër nga Madridi, Atletico, në edicionin aktual po shfaq futboll të mirë. Atletico Madridi luan në udhëtim te Mallorca të dielën nga ora 16:15.
Atletico ka 23 pikë, kurse Mallorca ka 18 pikë.
