Nexhmije Pagarusha përjetësohet në bronz

Amaneti i Bilbilit të Kosovës kishte qenë të prehej në vendlindje. E gati tre vjet pas vdekjes, aty u vendos busti i ikonës së këngës shqipe, Nexhmije Pagarusha.

Me ceremoni solemne, nën tingujt e “Bareshës” ikonike, të shtunën paradite në fshatin Pagarushë të Malishevës është zbuluar vepra e realizuar nga skulptori Agon Qosa, e cila e paraqet këngëtaren e shquar prej imazhit të saj në skenë.

Kryetari i Komunës së Malishevës, Ekrem Kastrati, ka thënë se Nexhmije Pagarusha e ka bërë krenare vendlindjen me melosin e saj artistik.

“Ndihem jashtëzakonisht krenar dhe i lumtur që kam rastin, bashkë me juve, të shpalosim bustin e një artisteje të madhe, të të gjithë trevave tona shqiptare. Jo veç Pagarusha, por edhe Malisheva do të jetë krenare me veprën artistike të artistes së madhe që tashmë i ka kaluar kufijtë administrativë”.

Projekti i realizuar kap shifrën gjithsej 47 mijë euro, i ngritur me mjetet e mërgimtarëve, banorëve dhe donatorëve të tjerë.

Kompleksi në hyrje të fshatit Pagarushë përfshin bustin dhe parkun, të cilin Komuna e Malishevës e ka përkrahur me 8 mijë e 500 euro.

Idenë për punimin e bustit fillimisht e kishte dhënë ambasadori i Shqipërisë në Kosovë, Qemajl Minxhozi.

Këngëtaren Pagarusha e ka quajtur si një prej vajzave epokale të Kosovës, e cila mbetet gjallë me trashëgiminë e saj artistike.

“Sot ne jemi më tepër krenarë, pasi vumë në vend një amanet të Nexhmijes për Pagarushën. Ajo kërkoi thjesht një varr, kur nuk mendonte të kishte një bust. Dhe ajo do të ishte tepër krenare po ta merrte vesh se në të ardhmen do të kujtohej në mënyrë të tillë. Pjesëmarrja kaq masive e njerëzve këtu, tregon se ajo nuk ka vdekur, ajo është në zemrat e të gjithë neve këtu”.

Tarik Pagarusha, vëllai i këngëtares Nexhmije Pagarusha, shkurt ka falënderuar ata që kontribuuan për të sjellë imazhin e këngëtares ikonike në vendlindje.

Kryesuesi i këshillit për projektin, Nysret Kryeziu, ka thënë se busti është shenjë mirënjohje për këngëtaren.

“40 vjet karrierë e bënë ‘Bareshën’ tonë të marrë emrin ‘Mbretëresha e muzikës shqiptare. Ajo nuk ndaloi kurrë së treguari prejardhjen e saj , siç thoshte ajo; fshati im, Pagarusha. Ndaj e nderuam këtë legjendë të gjallë duke ndërtuar një kompleks madhështor të cilin e meriton”.

Mikja e Pagarushës, këngëtarja Shpresa Gashi, e ka vlerësuar model për gjeneratën e saj e ato që e kanë pasuar.

“Ajo ka qenë diell për ne, për gjeneratën time dhe pas meje ka qenë institucion. Nuk dua ta zgjas më shumë, ishte më e madhja, e vetmja, e para”

Këngëtarja Shpresa Berisha, po ashtu mike e afërt e këngëtares Nexhmije Pagarusha, ka thënë se ngjarja, pos nderimit për të, ka qenë e dobishme edhe për publikun.

“Ajo na nderoi përjetësisht neve dhe sot ajo nuk është e vdekur, është këtu në Pagarushën e saj, në Kosovën e saj. Zëri dhe këngët e saj u përfaqësuan nga zëri i saj i kristaltë në tërë botën. Prandaj ajo dha porosi të shumta duke përfaqësuar atë këngë në gjithë vendet e botës”.

Sipas autorit të bustit, skulptorit Agon Qosa, vepra ka lartësi gjithsej 2 metra e gjysmë: një metër baza dhe 150 centimetra busti.

Ceremonisë së përurimit të bustit i kanë paraprirë homazhet te varri i saj, e në kuadër të ceremonisë, në shtëpinë e kulturës “Tahir Sinani” në Malishevë është mbajtur edhe një koncert.

Nexhmije Pagarusha vdiq më 7 shkurt të vitit 2020, në moshën 86-vjeçare. Zëri i saj është përjetësuar më shumë se në 150 këngë në periudhën mes viteve ’50 dhe mesit të viteve ‘80. Ajo është nderuar me medalje presidenciale për veprimtari jetësore, përderisa mban edhe titullin “Nderi i kombit”.