Të hënën, zjarrfikësit në Francë po përgatiteshin për fazën tjetër të luftës kundër zjarreve në pyje, në perëndim të Bordosë, qytetit të njohur për prodhimin e verës.
Me mijëra zjarrfikës në terren dhe me avionë që hidhnin ujë e lëndë frenuese të flakëve, përpjekja masive për shuarjen e zjarreve është një garë me kohën. Ekipet po përpiqen të bëjnë përparim përpara rritjes së parashikuar të temperaturave duke filluar nga e marta, gjë që mund ta vështirësojë luftën kundër flakëve.
Ekipet që përdornin makineri të rënda gërmimi po pastronin shirita pylli dhe shkurresh për të krijuar zona të zhveshura, me qëllim ndalimin e përhapjes së zjarreve.
Fermerët po furnizonin ekipet e zjarrfikësve me ujë, duke ua transportuar atë me cisterna.
Presidenti francez, Emmanuel Macron, ka zhvilluar të hënën një mbledhje urgjente për të diskutuar mbi zjarret gjigante e të pakontrolluara që kanë detyruar më shumë se 250,000 njerëz të largohen nga shtëpitë e tyre, pikërisht kur u shfaq një shenjë e parë shprese se përhapja e zjarrit më të madh mund të ketë ngadalësuar.
Macroni nuk ka bërë komente të menjëhershme pas mbledhjes së qeverisë për krizën, të cilën e drejtoi vetë.
Në një postim të fundjavës në platformën X, ai ka premtur mbështetje afatgjatë për komunitetet e prekura nga zjarret, duke thënë: "Ne do të rindërtojmë, do të riparojmë dhe do të jemi të pranishëm për aq kohë sa të jetë e nevojshme”.
Dhjetëra vende kanë ofruar avionë, helikopterë, zjarrfikës dhe ndihmë tjetër si për Francën, ashtu edhe për Spanjën, e cila gjithashtu po përballet me zjarre të përmasave të paprecedenta.
Franca, Spanja dhe Italia në luftë me zjarret, priten sërish ngritje temperaturash
Photo: Associated Press
Zjarrfikësit luftuan të hënën me zjarre të mëdha pyjore që po kërcënojnë qytetin francez dhe rajonin e njohur të verërave Bordo, ndërsa ekipet në Spanjë dhe Itali vazhduan përpjekjet për të vënë nën kontroll një sërë zjarresh pyjore që kanë shpërthyer që nga java e kaluar, si pasojë e një vere jashtëzakonisht të nxehtë dhe të thatë në Evropën Perëndimore.
Sipas autoriteteve, rreth 220.000 njerëz, përfshirë turistë dhe banorë vendas, janë evakuuar në Francë, ndërsa në Spanjën fqinje gati 100.000 persona janë urdhëruar të largohen nga shtëpitë e tyre.
Zjarret në Francë, të cilat shpërthyen javën e kaluar, tani ndodhen vetëm 15 kilometra larg zonës kryesore metropolitane të Bordos.
Ministri i Brendshëm i Francës, Laurent Nunez, ka thënë se zjarri ka ndaluar të përhapet, por ka paralajmëruar se rreziku ende nuk ka kaluar.
“Sa i përket vlerësimit të situatës me zjarrin në Gironde, e them këtë me shumë kujdes: situata është stabilizuar. Kjo do të thotë se zjarri nuk është përhapur gjatë natës, por duhet të mbetemi shumë të përqendruar dhe shumë të vendosur për të ndërhyrë në çdo moment”, ka deklaruar Nunez.
Autoritetet spanjolle kanë thënë se përhapja e zjarreve të mëdha që po bashkohen në Spanjën qendrore është ngadalësuar gjatë natës falë kushteve më të favorshme të motit. Megjithatë, agjencia meteorologjike paralajmëroi për një valë tjetër të mundshme të të nxehtit gjatë kësaj jave.
Kryeministri spanjoll, Pedro Sanchez, u ka bërë thirrje qytetarëve të hënën që të kenë kujdes maksimal dhe të ndërmarrin masa parandaluese.
“Na presin orë të vështira, orë komplekse. Brenda pak orësh do të ketë rritje të temperaturave dhe, për ditët në vijim, AEMET do të shpallë një valë të re të nxehti për të gjithë Gadishullin Iberik. Prandaj, u bëj thirrje të gjithë qytetarëve në mbarë vendin për kujdes maksimal dhe masa parandaluese. Siç e kam përmendur, tashmë janë djegur mbi 170.000 hektarë në të gjithë vendin”, është shprehur Sanchez.
Të ashtuquajturat zjarre të gjeneratës së gjashtë përfaqësojnë kategorinë më ekstreme dhe më të pakontrollueshme të zjarreve pyjore. Ato mund të shkatërrojnë mijëra hektarë në orë. Shumë shkencëtarë ua atribuojnë këto zjarre dhe valët e të nxehtit ndryshimeve klimatike të shkaktuara nga aktiviteti njerëzor.
Qeveria e presidentit Emmanuel Macron është mbledhur të hënën për të diskutuar situatën me zjarre.
Në Spanjën qendrore, tri fronte të veçanta zjarri mbeten aktive në malet në veriperëndim të Madridit.
Autoritetet vlerësojnë se deri tani janë djegur 77.000 hektarë në provincat Madrid, Toledo dhe Avila. Zjarri në Avila është klasifikuar si më i madhi në historinë moderne të Spanjës.
Në Italinë jugore, zjarrfikësit përdorën avionë për të hedhur ujë mbi vatrat e zjarrit, ndërsa persona u evakuuan nga shtëpitë e tyre si masë paraprake.
Ndërkohë, temperaturat parashihet se do të arrijnë nivele mbi mesataren në zonat e goditura nga zjarret në Spanjë dhe Francë gjatë ditëve në vijim, dhe nuk parashikohen reshje të konsiderueshme shiu që mund të lehtësojnë kushtet e thatësirës.