Vrau 20-vjeçaren në Gjermani dhe e varrosi në oborr të shtëpisë

Një 52-vjeçar është arrestuar në Albstadt të Gjermanisë nën dyshimin për vrasjen e një 23-vjeçari që nuk u mbijetoi plagëve në spital. Ndërkaq në oborrin e shtëpisë së të dyshimtit është gjetur trupi i varrosur i një gruaje 20-vjeçare.

Policia gjermane ka njoftuar se të tre njihnin njëri-tjetrin dhe ishin italianë, gruaja kishte edhe nënshtetësinë gjermane. Ajo ishte raportuar e zhdukur që nga e diela. Ajo dhe 52-vjeçari i dyshuar po jetonin në të njëjtën shtëpi, por në pjesë të ndara, kanë bërë të ditur autoritetet gjermane.

Ndërkaq, të premten, një punëtor i Shërbimit të Jashtëm të Inteligjencës Gjermane është arrestuar nën dyshimet për tradhti pasi ka ofruar informacione sekrete te Rusia, ka bërë të ditur prokuroria gjermane.

I dyshuari, shtetas gjerman, i identifikuar si Carsten L, është arrestuar të mërkurën në Berlin. Apartamenti dhe zyra e punës në Shërbimin Federal të Inteligjencës dhe një tjetër person janë bastisur.

Prokuroria nuk ka ofruar detaje të personit të dytë. Prokuroria gjermane ka thënë se punonjësi i BND-së ka ofruar informacione te një shërbim rus i inteligjencës, të cilin nuk e kanë identifikuar.