-
Përktheu:
Blerta Haxhiu
- 12 tetor 2026 12:26
- Shpërndaje në:
Turqia, Pakistani, Egjipti dhe Arabia Saudite kanë dënuar sulmet e rebelëve Houthi të Jemenit, të mbështetur nga Irani, ndaj aeroportit ndërkombëtar të Riadit.
Katër vendet i cilësuan ato si një përshkallëzim të rrezikshëm, që nuk mund të justifikohet apo pranohet në asnjë rrethanë, raporton Reuters.
Autoritetet saudite njoftuan se një person u vra dhe dhjetëra të tjerë u plagosën nga një sulm i ri ndaj aeroportit ndërkombëtar të Riadit të dielën.
Kjo ndodhi një ditë pasi një sulm, për të cilin përgjegjësinë e morën Houthit, la 13 të vrarë dhe më shumë se 300 të plagosur.
Katër fuqitë rajonale, të njohura si grupi R4, rikonfirmuan solidaritetin dhe mbështetjen e tyre për Arabinë Saudite. Ato u zotuan të mbështesin plotësisht të gjitha masat legjitime që Riadi ndërmerr për t'u kundërpërgjigjur sulmeve, për të parandaluar kërcënimet dhe për të shmangur përsëritjen e tyre.
Në një deklaratë të përbashkët të dielën, vendet e grupit e bënë grupin Houthi plotësisht përgjegjës për pasojat e sulmeve dhe për çdo ndikim që ato mund të kenë në paqen dhe sigurinë rajonale e ndërkombëtare. Ato kërkuan që sulmet të ndalen menjëherë dhe pa kushte.
Turqia, anëtare e NATO-s, dhe Pakistani, që zotëron armë bërthamore, nënshkruan në gusht një marrëveshje të përbashkët mbrojtjeje me Arabinë Saudite. Sipas marrëveshjes, një sulm ndaj njërës palë konsiderohet sulm ndaj të gjithave.
Javën e kaluar, të tria vendet njoftuan se kishin rënë dakord të zbatonin angazhimet e tyre të përbashkëta në fushën e mbrojtjes dhe të siguronin vendosjen e shpejtë të forcave dhe kapaciteteve ushtarake në Arabinë Saudite, në kushtet e sulmeve të vazhdueshme të grupit.