Ushtarët ukrainas janë stërvitur në Poloninë perëndimore për luftë në kushte dimërore para se të dërgohen në front kundër Rusisë.
Trajnimi është bërë nga ushtarë nga Polonia, Franca dhe Belgjika, shkruan Reuters.
"Shumica e njerëzve në fakt nuk kanë përvojë ushtarake dhe ata janë mësuar se si të ekzekutojnë disa taktika bazë. Ne jemi mësuar të përdorim armët në zonat urbane dhe në llogore”, tha një ushtar ukrainas.
Trajnimi u krye nga Komanda e Trajnimit të Kombinuar të Armëve, e cila u krijua si pjesë e përpjekjeve të Bashkimit Evropian për të ndihmuar ushtrinë e Ukrainës teksa stërvitjet janë zhvilluar në 24 nga 27 shtetet anëtare të bllokut.
"Ne do të vazhdojmë të përshtatemi sepse situata në fushën e betejës po ndryshon çdo ditë," tha gjenerallejtënant Michiel van der Laan, Drejtor i Përgjithshëm i Shtabit Ushtarak të Bashkimit Evropian.
Rusia pushtoi Ukrainën në shkurt 2022 dhe tani kontrollon gati një të pestën e territorit të saj ndërsa një kundërofensivë ukrainase, e nisur që nga qershori, nuk ka bërë asnjë përparim të madh.
Edhe
Ukraina thotë se këtë vit ka rikthyer mbi 600 kilometra katrorë territor të marrë nga Rusia
Komandanti i Përgjithshëm i Ukrainës, gjenerali Valery Zaluzhnyi, ka thënë se lufta po shkon drejt një faze të re të luftimeve statike dhe të paqëndrueshme, e cila mund të lejojë Moskën të rindërtojë fuqinë e saj ushtarake. Operacionet mund të ndërlikohen më tej nga moti i ftohtë i dimrit.
"Unë do të thosha se dimri është stina më kërkuese kur bëhet fjalë për luftën. Ai kufizon rëndë lëvizjen dhe manovrimin tonë, ndërsa armiku na sheh qartë përmes kamerave të nxehtësisë dhe dronëve", tha ushtari ukrainas.
