Trumpi ndalon hyrjen në SHBA edhe për shtetasit e pesë vendeve të tjera

Shtëpia e Bardhë ka bërë të ditur të martën se presidenti Donald Trump ka nënshkruar një vendim për të kufizuar edhe më tej hyrjen e shtetasve të huaj në Shtetet e Bashkuara.

Në njoftimin e saj, Shtëpia e Bardhë ka thënë se SHBA-ja ka vendosur kufizime të plota dhe hyrje të kufizuara për shtetasit nga pesë vende - Burkina Faso, Mali, Nigeri, Sudani i Jugut dhe Siria.

Këto vende janë shtuar pas listës fillestare prej 12 vendesh të publikuar në qershor, shtetasve të të cilave u ndalohej hyrja në SHBA. 

Administrata Trump ka thënë në njoftimin e saj se shumë nga vendet nga të cilat po kufizonte udhëtimin kishin "korrupsion të përhapur gjerësisht, dokumente civile dhe të dhëna kriminale mashtruese ose të pabesueshme" që e bënin të vështirë verifikimin e qytetarëve të tyre për udhëtim në SHBA.

Ajo ka shtuar se disa vende kishin shkallë të lartë njerëzish që qëndronin më gjatë se vizat e tyre, refuzuan të merrnin mbrapsht qytetarët e tyre që SHBA-ja dëshironte t'i deportonte ose kishin një "mungesë të përgjithshme stabiliteti dhe kontrolli qeveritar", gjë që e bënte verifikimin të vështirë.