Trumpi jep shenjë se mund ta përdorë ushtrinë për dëbimin e emigrantëve

Presidenti i sapozgjedhur, Donald Trump ka dhënë indikacione të hënën se ai dëshiron të përdorë ushtrinë për të zbatuar synimet e tij të deklaruara më parë për dëbimin masiv të emigrantëve pa dokumente nga SHBA, sapo të marrë detyrën.

Presidenti ka folur për shpalljen e një emergjence kombëtare për të angazhuar ushtrinë amerikane për të ndihmuar në dëbimin e miliona njerëzve që ai mendon se ndodhen në SHBA në mënyrë të paligjshme, raporton The Guardian.

Trump u përgjigj “E VËRTETË” në një postim herët në mëngjes në platformën e tij “Truth Social”, kur një aktivist konservator tha se kishte dëgjuar raporte të tilla.

Trumpi ka folur gjatë gjithë fushatës së tij presidenciale se do të bëjë dëbimin e emigrantëve të paligjshëm dhe se do ta ndërtojë murin me Meksikën.