“Tani jam unë gjuetari”: Trump përmbys narrativën, reagon mes kritikash për dosjet Epstein

Shtëpia e Bardhë ka shpërndarë një postim në rrjetin social X të hënën, i cili e shpërfaq presidentin amerikan, Donald Trump, në mesin e flamujve amerikanë dhe shqiponjave, me fishekzjarrë në sfond, të shoqëruar me mbishkrimin “Isha dikur preja, tani jam gjuetari”, shprehje kjo e presidentit republikan që iu referohet rivalëve të tij politikë nga Partia Demokratike.

Në vazhdim të postimit, sugjerohet se “ata (Demokratët) i janë vënë pas njeriut të gabuar”.

Ky postim është bërë në një kohë kur Trumpi ndodhet nën presion të shtuar për shkak të dosjeve të publikuara së fundmi për çështjen e Jeffrey Epstein.

Aktualisht, ai ka shënuar muajin e tij të gjashtë në Shtëpinë e Bardhë.

E sipas analizës së portalit Firstpost, këto 6 muaj u karakterizuan nga kaosi, problemet e brendshme dhe përplasjet me shtetet e tjera që e kanë vendosur atë me shpatulla mbrapa murit. Ai është përballur jo vetëm me kritikat e kundërshtarëve, por edhe me ato bazës së madhe të votuesve të “Make America Great Again” (MAGA).

Bazuar në të dhënat historike të politologëve amerikanë, imazhet dhe retorika polarizuese, si në këtë postim, mund të rrisë mbështetjen e votuesve për 5 deri në 7 për qind, duke u vlerësuar si lëvizje strategjike për të mobilizuar masën e gjerë në fillim të mandatit të tij të dytë.