Kryeministri i Britanisë së Madhe, Rishi Sunak, ka thënë se kur bëhet fjalë për ndihmë ushtarake për Ukrainën, shteti i tij nuk e përjashton asnjë diskutim.
Në një konferencë të përbashkët për media me presidentin ukrainas, Volodymyr Zelensky të mërkurën në Londër, Sunak ka thënë se edhe dërgimi i avionëve luftarakë është pjesë e bisedës, raportoi BBC-ja.
"Ka qenë shumë e qartë se kur bëhet fjalë për ofrimin e ndihmës ushtarake për Ukrainën asgjë nuk është jashtë tryezës. Kur bëhet fjalë për forcat ajrore luftarake, sigurisht që ata janë pjesë e bisedës, kjo është arsyeja pse ne kemi njoftuar sot se do të trajnojmë forcat ajrore ukrainase në platformat e standardeve të NATO-s”, është shprehur Sunak.
Ndërkaq, Zelensky ka thënë se Ukraina ka nevojë për shumë pajisje dhe se këto nevoja varen nga situata në fushën e betejës.
