Spanja zbut masat, izolimi solli sukses

Spanja, një nga vendet më të prekura nga koronavirusi, të hënën ka nisur me zbutjen e masave të izolimit që i ka pasur në funksion qe më shumë se një muaj.

Numri i vdekjeve në Spanjë si pasojë e koronavirusit ka arritur në 17489 të hënën, për 517 më shumë se të dielën, ka bërë të ditur Ministria e Shëndetësisë. Numri i rasteve të konfirmuara ka arritur në 170 mijë.

Gjithsesi, kjo ishte rritja më e vogël në një periudhë të gjatë dhe me shenjat e mira të ndalimit të shpërndarjes, disa biznese, përfshirë ato të ndërtimit dhe prodhimit, janë lejuar të rihapen. Por shumica e popullatës ka mbetur e izoluar dhe dyqanet, kafenetë e hapësirat publike do të mbesin të mbyllura deri më 26 prill të paktën.

Njerëzit në transportin publik kanë marrë maska nga policia teksa shkonin në punë të hënën.

Masat e rrepta të izolimit kanë ndikuar dukshëm në shkallën e vdekjes në Spanjë, që pikun e pati në fillim të prillit.