Një person është vrarë pas shpërthimeve në një bazë ushtarake në Krime, ka thënë kreu i administratës rajonale të emëruar nga Rusia, shkruan BBC të martën.
Sergei Aksyonov shkroi në mediat sociale se shpërthimet kishin ndodhur në bazën ushtarake Saky pranë Novofedorivka në bregun perëndimor të gadishullit.
Ministria ruse e Mbrojtjes tha më vonë se municioni kishte shpërthyer, por kjo nuk është verifikuar.
Gadishulli ukrainas që Moska aneksoi në vitin 2014 është një destinacion popullor për turistët rusë.
Deri më tani, rajoni është kursyer nga bombardimet intensive që kanë pësuar zona të tjera të Ukrainës.
Dëshmitarët lokalë i thanë agjencisë Reuters se dëgjuan të paktën 12 shpërthime, duke filluar rreth orës 16:20 me kohën lokale.
Pas mbërritjes në zonë, Aksyonov konfirmoi se ishte krijuar një zonë e ndaluar prej 5 km rreth vendit të shpërthimit.
Moska refuzoi të spekulojë mbi origjinën e shpërthimit dhe Kievi nuk ka marrë përgjegjësinë.
Por zëvendëskryeministrja e Ukrainës, Iryna Vereshchuk, shkroi në Telegram se "shpërthimet e sotme në Novofedorivka janë një tjetër kujtesë se kujt i përket Krimea. Sepse është Ukraina".
