Një sulm ajror, që pretendohet se është kryer nga Izraeli, ka shkatërruar ndërtesën e Konsullatës së Iranit në kryeqendrën e Sirisë, Damask, duke vrarë disa persona, raportojnë mediumet shtetërore siriane, transmeton “BBC”.
Në foto është parë tym dhe pluhur te ndërtesa e shembur, që është menjëherë ngjitur me Ambasadën e Iranit në autostradën në qarkun perëndimor Mezzeh në Damask.
Një agjenci iraniane e lajmeve ka pretenduar për pesë të vrarë, ndërsa një grup monitorues me seli në Britani të Madhe ka thënë se shifra e viktimave ka arritur në tetë.
Ushtria e Izraelit ka thënë se nuk komenton raportimet e mediave të huaja.
Ushtria e Sirisë ka thënë se një aeroplan ushtarak izraelit ka shënjestruar ndërtesën e Konsullatës nga drejtimi i Rrafshnaltës Golan të okupuar, rreth orës 17:00 me kohë lokale.
Mbrojtja ajrore e Sirisë ka rrëzuar disa nga raketat e lëshuara nga aeroplani, por disa kanë goditur ndërtesën dhe kanë çuar te shkatërrimi i plotë, duke shkaktuar vdekjen apo lëndimin e të gjithëve që ishin brenda, ka thënë ushtria siriane.
Edhe
Shtatë të vdekur nga sulmi izraelit në Damask
Ushtria ka thënë se po vazhdon punën për të nxjerrë viktimat nga rrënojat.
Nuk ka dhënë detaje për identitetet e të vdekurve, por televizioni shtetëror iranian ka thënë se nuk ka pasur personel të ambasadës brenda ndërtesës në kohën e sulmit.
Një burim i sigurisë i Libanit ka thënë për agjencinë “Reuters” se në mesin e të vdekurve është komandanti i lartë i Gardës Revolucionare të Iranit, Mohammad Reza Zahedi.
