-
Përktheu:
Flutura Gashi-Mehmeti
- 18 qershor 2025 08:54
- Shpërndaje në:
Forcat amerikane janë tërhequr nga dy baza të tjera në verilindje të Sirisë, kanë zbuluar gazetarët e Reuters që kanë vizituar vendet.
Komandanti i forcave kurde siriane të mbështetura nga SHBA-ja ka thënë se tërheqja po lejonte një ringjallje të Shtetit Islamik.
Gazetarët e Reuters që vizituan dy bazat javën e kaluar i kanë gjetur ato të zbrazëta, të dyja të ruajtura nga kontingjente të vogla të Forcave Demokratike Siriane - grupi ushtarak i udhëhequr nga kurdët që Uashingtoni e ka mbështetur në luftën kundër Shtetit Islamik për një dekadë.
Kamerat e përdorura në bazat e pushtuara nga koalicioni ushtarak i udhëhequr nga SHBA-ja ishin hequr dhe telat me gjemba në perimetrin e jashtëm kishin filluar të vareshin.
Një politikan kurd që jeton në njërën bazë ka thënë se nuk kishte më trupa amerikane atje. Rojet e SDF-së në bazën e dytë kanë thënë se trupat janë larguar kohët e fundit, por nuk pranuan të thoshin se kur.
Pentagoni ka refuzuar të komentojë.
Është konfirmimi i parë në terren nga gazetarët se SHBA-ja është tërhequr nga bazat Al-Wazir dhe Tel Baydar në provincën Hasaka. Kjo e çon në të paktën katër numrin e bazave në Siri që trupat amerikane janë larguar që kur presidenti Donald Trump ka marrë detyrën.
Administrata e Trumpit ka thënë këtë muaj se do ta zvogëlojë praninë e saj ushtarake në Siri në një bazë, nga tetë në pjesë të Sirisë verilindore që kontrollohen nga SDF-ja.
New York Times ka raportuar në prill se trupat mund të reduktohen nga 2,000 në 500 gjatë tërheqjes.
Por komandanti i SDF-së, Mazloum Abdi, i cili ka folur për Reuters në një bazë tjetër amerikane, Al Shadadi, ka thënë se prania e disa qindra trupave në një bazë do të ishte "e pamjaftueshme" për të përmbajtur kërcënimin e Shtetit Islamik.
"Kërcënimi i Shtetit Islamik është rritur ndjeshëm kohët e fundit. Por ky është plani i ushtrisë amerikane. Ne e kemi ditur për këtë për një kohë të gjatë dhe po punojmë me ta për t'u siguruar që nuk ka boshllëqe dhe ne mund të vazhdojmë presionin mbi Shtetin Islamik", ka thënë Abdi.
