-
Përktheu:
Flutura Gashi-Mehmeti
- 22 korrik 2026 07:36
- Shpërndaje në:
SHBA-ja ka nisur vonë të martën sulme ndaj Iranit për natën e 11-të radhazi, ndërsa Teherani ka paralajmëruar Uashingtonin të mos shënjestrojë objektet e tij bërthamore.
Komanda Qendrore e SHBA-së (Centcom) ka thënë se vala e sulmeve ishte "projektuar për të vazhduar dobësimin e aftësisë së Iranit për të kërcënuar transportin tregtar detar" në Ngushticën e Hormuzit.
Mediat shtetërore iraniane kanë raportiar se mbrojtja ajrore u aktivizua në kryeqytetin Teheran. Shpërthime janë raportuar gjithashtu në Tabriz, Çabahar, Konarak dhe në Bushehr, ku ndodhet centrali i vetëm bërthamor i Iranit.
Irani, i cili është kundërpërgjigjur ndaj SHBA-së dhe aleatëve të saj në Lindjen e Mesme, ka paralajmëruar hakmarrje pasi presidenti amerikan, Donald Trump, ka deklaruar se SHBA-ja së shpejti do të godiste një objekt nëntokësor bërthamor pranë Natanzit.
Irani dhe SHBA-ja kanë rënë dakord për një armëpushim në prill, por armiqësitë rifilluan javën e kaluar, ndërsa të dy vendet u përplasën për kontrollin e rrugës ujore jetike të Ngushticës së Hormuzit.
Centcom ka njoftuar se forcat amerikane kishin goditur qendra të operacioneve ushtarake iraniane, kapacitete detare, hangarë avionësh, depo dronësh dhe infrastrukturë logjistike ushtarake.
Gjithashtu, ajo ka akuzuar Iranin se gjatë tre muajve të fundit kishte sulmuar më shumë se 30 anije tregtare që kalonin nëpër Ngushticën e Hormuzit.
"Këto sulme të pajustifikuara kanë rrezikuar qindra marinarë të pafajshëm dhe kanë minuar lirinë e lundrimit”, thuhet në një deklaratë, duke shtuar se rruga ujore mbetet e hapur për kalimin e anijeve tregtare.
Ushtria e Kuvajtit ka njoftuar mëngjesin e së mërkurës se sistemet e saj të mbrojtjes ajrore po përballeshin me sulme me dronë nga Irani, ndërsa Bahrejni dhe Jordania kanë thënë se kishin penguar gjithashtu sulme me dronë dhe raketa.
Më herët, Trumpi ka thënë se objektivi i ardhshëm ushtarak mund të ishte një kompleks i njohur si Pickaxe Mountain, një objekt nëntokësor bërthamor ku Irani dyshohet se po ndërton një impiant të padeklaruar për pasurimin e uraniumit.
"Do ta godasim atë zonë shumë shpejt dhe me forcë të madhe”, ka thënë Trumpi gjatë një deklarate për gazetarët në Shtëpinë e Bardhë, në një takim me presidentin e Libanit, Joseph Aoun.
Ai ka shtuar se zakonisht nuk do të shpallte objektivat ushtarake paraprakisht, por "nuk ka asgjë që ata mund të bëjnë për ta parandaluar".
Trump ka kërcënuar gjithashtu se do të "merrej" me rebelët Houthi nëse grupi militant i mbështetur nga Irani në Jemen do ta zbatonte kërcënimin për të bllokuar portet saudite.
Më herët, një zyrtar i mediave të Houthive kishte deklaruar se ata po mbyllnin Ngushticën Bab al-Mandab, hyrjen jugore të Detit të Kuq, për anijet saudite.
Deti i Kuq është bërë një rrugë jetike për transportin e naftës nga Arabia Saudite gjatë luftës SHBA-Izrael kundër Iranit, e cila ka çuar në mbylljen de facto të Ngushticës së Hormuzit.
Rubio paralajmëron për "precedent të rrezikshëm" nëse Irani lejohet të kontrollojë Hormuzin
Photo: Associated Press
Sekretari amerikan i Shtetit, Marco Rubio, ka deklaruar se Irani "nuk është serioz për bisedimet", gjatë fjalës së tij hyrëse në takimin e ministrave të jashtëm të Shoqatës së Kombeve të Azisë Juglindore (ASEAN), të mbajtur të mërkurën në Manila të Filipineve.
"SHBA-ja është gjithmonë e përkushtuar ndaj diplomacisë. Ne jemi të hapur dhe gjithmonë të gatshëm të angazhohemi, të negociojmë dhe t'i zgjidhim mosmarrëveshjet”, ka deklaruar Rubio.
Ai ka shtuar se "problemi që kemi aktualisht (me Iranin) është se ata nuk janë seriozë për bisedimet.
Nëse ata janë seriozë, edhe ne jemi. Nëse jo, atëherë ne do të bëjmë atë që është e nevojshme për të mbrojtur interesat tona, si dhe interesat e aleatëve tanë”.
Rubio ka paralajmëruar për krijimin e një "precedenti të rrezikshëm" nëse Irani do të lejohej të kontrollonte Ngushticën e Hormuzit, duke thënë se ata "nuk e kanë, sipas asnjë mekanizmi ligjor ekzistues", të drejtën për të kontrolluar lëvizjen e trafikut nëpër këtë rrugë ujore ndërkombëtare.
“Në lojë është parimi themelor i lirisë së lundrimit", ka deklaruar Rubio.
"Nëse ky parim kërcënohet, atëherë mendoj se kërcënohet edhe ekonomia globale, si dhe rregullat që kanë mbështetur 150 vjet tregti ndërkombëtare”, ka deklaruar ai.
Ngushtica e Hormuzit ishte plotësisht e hapur për kalim të lirë dhe të sigurt para se SHBA-ja dhe Izraeli të sulmonin Iranin në shkurt, në fillim të konfliktit.
Irani e sheh kontrollin e kësaj rruge ujore si mjetin e tij më të vlefshëm presioni në negociata dhe, gjatë javëve të fundit, ka qëlluar vazhdimisht ndaj anijeve që, sipas tij, nuk kishin komunikuar me autoritetet iraniane para se të kalonin aty.