SHBA-ja dhe Mbretëria e Bashkuar kanë rënë dakord për një marrëveshje për të mbajtur në zero tarifat mbi importet farmaceutike të Mbretërisë së Bashkuar në Amerikë.
Sipas marrëveshjes, Mbretëria e Bashkuar do të paguajë më shumë për ilaçet përmes NHS-së (Shërbimi Shëndetësor Kombëtar) në këmbim të një garancie se taksat e importit mbi produktet farmaceutike do të mbeten në zero për tre vjet.
Produktet farmaceutike janë një nga eksportet më të mëdha të Mbretërisë së Bashkuar në SHBA, e cila është gjithashtu tregu më i madh deri tani për prodhuesit e mëdhenj të barnave në Mbretërinë e Bashkuar, përfshirë GSK dhe AstraZeneca.
Në fillim të vitit, presidenti i SHBA-së Donald Trump njoftoi rritje masive të taksave mbi mallrat e importuara në vend, të cilat ai argumentoi se do të krijonin vende pune dhe do të nxisnin prodhimin amerikan.
Në qershor, Trumpi nënshkroi një marrëveshje me Mbretërinë e Bashkuar për të hequr disa barriera tregtare midis vendeve dhe për të ulur taksat mbi shumicën e mallrave të eksportuara në SHBA në 10%.
Por për produktet farmaceutike nuk u bë e ditur.
Trumpi ka argumentuar se konsumatorët amerikanë në mënyrë efektive subvencionojnë ilaçet për vendet e tjera të zhvilluara duke paguar çmime premium për ato ilaçe.
Në 12 muajt deri në fund të shtatorit, Mbretëria e Bashkuar eksportoi ilaçe me vlerë 11.1 miliardë funte në SHBA, duke përbërë 17.4% të të gjitha eksporteve të mallrave në atë periudhë, sipas Departamentit për Biznes dhe Tregti.