Tajlanda ka njoftuar të hënën se ka kryer sulme ajrore ndaj pozicioneve ushtarake të Kamboxhias për shkak të luftimeve që kanë nisur në zona të shumta përgjatë kufirit të tyre të diskutueshëm.
Të dyja vendet kanë akuzuar njëra-tjetrën për shkelje të armëpushimit të ndërmjetësuar muaj më parë nga presidenti i Shteteve të Bashkuara të Amerikës, Donald Trump, raportoi Reuters.
Sipas një zëdhënësi të ushtrisë tajlandeze, të paktën një ushtar i tyre është vrarë dhe tetë të tjerë janë plagosur në luftimet e rinisura rreth orës 5:00 të mëngjesit sipas orës lokale, teksa shtoi se u është bashkuar edhe mbështetja nga ajri.
Forcat Ajrore të Tajlandës kanë deklaruar se Kamboxhia ka mobilizuar artileri të rëndë dhe ka zhvendosur njësi luftarake.
“Këto zhvillime detyruan përdorimin e fuqisë ajrore për të penguar dhe zvogëluar aftësitë ushtarake të Kamboxhias”, thuhet në deklaratë.
Ministria e mbrojtjes e Kamboxhias ka thënë se ushtria tajlandeze ka nisur sulme në agim ndaj forcave të saj në dy vende, pas disa ditësh veprimesh provokuese, dhe shtoi se trupat kamboxhiane nuk janë përgjigjur.
Ish-lideri i fuqishëm i Kamboxhias, Hun Sen, babai i kryeministrit aktual Hun Manet, tha se ushtria e Tajlandës është "agresore".
Tre civilë kamboxhianë janë plagosur rëndë në luftime deri më tani.