Presidenti rus Vladimir Putin thotë se gjiganti shtetëror i energjisë Gazprom është gati të përmbushë detyrimet e tij për eksportet e gazit, shkruan CNN.
“Gazprom ka përmbushur, po i përmbush dhe do të përmbushë plotësisht detyrimet e tij”, u tha Putin gazetarëve në Teheran pas bisedimeve me liderët e Iranit dhe Turqisë.
Gazprom muajin e kaluar uli kapacitetin përgjatë gazsjellësit Nord Stream 1 në 40 për qind të niveleve normale, për shkak të dëmtimit të një turbine që po rregullohet në Kanada, siç pretendon kompania.
Moska tha në fillim të këtij muaji se do të rrisë furnizimet me gaz në Evropë pas kthimit të turbinës.
Qeveria kanadeze më 10 korrik tha se do ta kthente atë në Gjermani. Turbina do t'i transferohej më pas Gazpromit, operatori i tubacionit, në mënyrë që Kanadaja të mos shkelte sanksionet perëndimore ndaj Rusisë.
Rusia më pas pezulloi dërgesat e gazit natyror në Gjermani përmes gazsjellësit Nord Stream 1 për 10 ditë pasi kryen mirëmbajtjen vjetore.
Ndërprerja, e cila filloi më 11 korrik, ngriti shqetësimin në Gjermani se Kremlini mund të gjente një arsye për të zgjatur ndalimin si një mënyrë për të ndëshkuar Berlinin për mbështetjen ndaj Ukrainës pas pushtimit të Rusisë.