Autoritetet gjermane kanë bastisur të martën shtëpitë e 17 personave në shtetin e Bavarisë, të cilët janë akuzuar se kanë shpërndarë mesazhe antisemitike nëpër rrjete sociale e po ashtu kërcënime drejtuar hebrenjve, raporton agjencia “AP”.
Sipas Policisë së Bavarisë, të dyshuarit ishin të moshave nga 18 deri 62 vjeç. 15 ishin burra e dy gra.
Policia ka intervistuar ata dhe ka sekuestruar dëshmi nga shtëpitë e tyre, përfshirë telefonë celularë dhe laptopë.
Të dyshuarit raportohet se i janë gëzuar sulmit të militantëve të Hamasit në Izrael më 7 tetor, dhe u akuzuan se kishin shpërndarë mesazhe urrejtjeje ndaj hebrenjve në rrjete sociale. Ata raportohet se kanë përdorur edhe simbole të organizatave terroriste.
Policia u fokusua kryesisht në Mynih, ku ishin nëntë nga të akuzuarit. Po ashtu u kryen bastisje edhe në Fuessen dhe Kaufbeuren, si dhe në çarqet Passau, Feurstenfeldbruck, Berchtesgadener Land, Coburg, Aschaffenburg dhe Hassberge.
Një nga të dyshuarit raportohet se dërgoi një stiker në grupin e klasës në WhatsApp me fjalët “gaz për hebrenjtë”.
Një tjetër, me shtetësi gjermano-turke, shkroi se hebrenjtë nuk meritojnë asgjë më tepër sesa “shfarosje”.
“Për fat të keq, antisemitizmi ka ndikim në jetën e përditshme të shumë hebrenjve në Gjermani”, ka thënë komisari i Policisë së Bavarisë, Michael Weinzierl. “Sulmi terrorist i Hamasit kundër Izraelit po ashtu ka pasur ndikim në jetët në Gjermani’.
Muajin e kaluar, kancelari gjerman Olaf Scholz dhe presidenti i Gjermanisë, Frank-Walter Steinmeier, dënuan rritjen e antisemitzimit në Gjermani pas luftës Izrael – Hamas.
