Teksa një shpërthim i COVID-19 pushton Hong-Kongun, është e vështirë për 7.4 milionë banorët e tij të dinë se çfarë do të ndodhë më pas.
Pasiguria është e vetmja siguri pasi raftet e dyqaneve janë zhveshur nga mallrat, kompanitë kineze kontinentale krijojnë qendra të mëdha izolimi dhe testi, kurse qeveria dërgon mesazhe të përziera nëse do ta mbyllë popullsinë për testim masiv në mbarë qytetin.
Kufizimet e pandemisë kanë thithur shumë energji nga një qytet kozmopolit i njohur për dritat e tij prej neoni dhe turmat e dendura. Mbyllja e fundit, e shpallur të mërkurën, janë plazhet publike. Një sistem shëndetësor i mbingarkuar do të thotë që ata të cilët infektohen shpesh duhet të kujdesen për veten e tyre. Numri i vdekjeve, veçanërisht në mesin e të moshuarve, vazhdon të rritet.
“Është situatë e pandreqshme”, ka theksuar Wong Wing-tsang, nënë beqare e cila kishte kaluar ditë të tëra duke u përpjekur të merrte një takim me mjekun për vajzën e saj 10-vjeçare, që doli pozitive në fillim të këtij muaji. “Mund të mbështetemi vetëm te vetja”.
Pas mbajtjes së virusit kryesisht larg për gati dy vjet, autoritetet e Hong- Kongut nuk kanë qenë në gjendje të vënë nën kontroll një shpërthim të nxitur nga varianti Omicron. Aq shumë njerëz janë infektuar saqë nuk ka shoferë të mjaftueshëm për autobusët, metrotë e qytetit apo nëpunës për t’i mbajtur hapur disa dyqane.
Edhe
Nga abuzimi te shpresa: lufta e grave kundër martesave të detyruara në Kinë
Kina është përgjigjur duke dërguar ekspertë, staf mjekësor dhe ekuipazhe ndërtimi, duke zgjeruar kapacitetin, mirëpo edhe duke rritur frikën se Hong- Kongu mund të miratojë kufizime të ashpra të stilit kontinent.
Banorët e shqetësuar kanë grumbulluar nevojat e përditshme, teksa qeveria hedh poshtë planet për testime masive dhe për bllokim. Infeksionet mes drejtuesve të kamionëve ndërprenë dërgesat e mishit dhe perimeve nga Kina kontinentale, duke shkaktuar frikë për mungesa dhe dërgesa nga deti.
“Sinqerisht, mendoj se politikat e qeverisë vazhdojnë të ndryshojnë gjatë gjithë kohës dhe është e vështirë që banorët t’i ndjekin ato”, ka thënë Alison Hui, banore e Hong-Kongut. “Ne nuk e dimë nëse një njoftim që vjen mund të jetë i vërtetë apo jo. Kjo na bën të ndihemi më të shqetësuar”.
Muajin e kaluar, zyrtarët njoftuan për një testim masiv në mbarë qytetin, të planifikuar në mars, mirëpo thanë se nuk kishte plane për një bllokim. Ditë më vonë, teksa rastet u rritën, zyrtarët pranuan se një bllokim ishte në shqyrtim, duke i shtyrë banorët t’i zbraznin raftet e supermarketeve për të rezervuar ushqime.
Më pas, dy javë pas njoftimit të shkurtit, udhëheqësja e Hong-Kongut, Carrie Lam, ka thënë se testimi në mbarë qytetin kishte marrë një prapavijë të përkohshme pasi autoritetet u përqendruan në uljen e numrit të vdekjeve dhe rasteve kritike, mirëpo as ajo nuk tha se kur mund të ndodhte testimi.
Hong-Kongu ishte në gjendje të mbyllte katër shpërthime të mëparshme me kufizime të ashpra “zero COVID” që mbyllën përkohësisht bizneset, kufizuan tubimet publike dhe vendosën kufizime të hyrjes, si qëndrimet e gjata në karantinë për mbërritjet dhe ndalimet e fluturimeve nga vendet që konsiderohen me rrezik të lartë.
Kjo ka ndryshuar në valën e pestë. Qëkur filloi në fund të dhjetorit janë raportuar mbi 760.000 infeksione, me më shumë se 4.300 vdekje. Morgjet ishin plot saqë u desh të vendoseshin kontejnerë frigoriferikë për t’i ruajtur disa prej trupave.
Edhe
Vlerësohet “alarmante” situata me përhapjen e Ebolës në Kongo
Shumë infeksione ka të ngjarë të mos llogariten pasi banorët vetëtestohen me teste të shpejta të antigjenit dhe izolohen në shtëpi. Studiuesit në Universitetin e Hong-Kongut vlerësuan se gati 3.6 milionë njerëz – rreth gjysma e popullsisë së qytetit-janë infektuar që nga 14 marsi, bazuar në modelim dhe të dhëna.
Lam, i cili ka filluar të mbajë konferenca të përditshme për shtyp mbi shpërthimin, të mërkurën ka njoftuar se piku është arritur më 3 mars, e më pas ka treguar një prirje rënëse, megjithëse shpërthimi është rrafshuar që nga e premtja e kaluar.
Autoritetet kontinentale kanë ndihmuar në ndërtimin e spitaleve të urgjencës dhe laboratorëve të testimit me fryrje. “Kjo është një situatë e paprecedentë”, ka theksuar Lam më herët, duke thënë se kishte tejkaluar kapacitetin e qeverisë së qytetit.
Wong, nëna beqare, tha se e vetmja ndihmë që mori nga qeveria ishte një paketë me pesë komplete testimi të shpejtë të antigjenit. Ajo dërgoi vajzën e saj të jetonte me vjehrrën e saj, e cila gjithashtu ishte e infektuar, pasi nuk kishte asnjë mënyrë për t'u izoluar në shtëpinë e tyre.
“Nuk kisha zgjidhje tjetër. Nuk mund ta lija të izolohej vetëm në shtëpi dhe nuk kemi dhoma gjumi të mjaftueshme për të na ndarë siç duhet”, ka bërë të ditur Wong.
Pandemia ka gjunjëzuar shumë biznese. Disa restorante, që ishin të kufizuara edhe një herë vetëm për marrjen dhe dërgimin pas orës 18:00, janë mbyllur përgjithmonë.
Shumë dyqane në qendrat tregtare janë mbyllur përkohësisht – disa për mungesë biznesi, të tjera për shkak se kanë mungesë të personelit pasi punëtorët kanë rezultuar pozitivë. Sallonet e flokëve u lejuan të rihapen kohët e fundit, mirëpo palestrat dhe baret u urdhëruan të mbyllen në janar dhe nuk do të rihapen deri pas mesit të prillit.
Edhe
Ebola po përhapet më shpejt sesa mendohej
“Gjithçka po fillonte më të vërtetë të dukej deri në fund të 2021-tës, ne prisnim të hapeshim me Kinën”, ka treguar Francis Lun, menaxher investimesh dhe komentues veteran i tregut. “Por krejt papritur, Omicron goditi dhe është krejt jashtë kontrollit tani”.
Pas dy vjetësh, “nuk po shihet fundi në horizont”, ka përfunduar ai.
