Presidenti i Turqisë, Recep Tayyip Erdogan, i cili nuk ndihej mirë që nga mbrëmja e së martës, u rishfaq të shtunën në publik në Stamboll, njoftuan stacionet televizive.
Vonë të martën, Erdoganit iu desh të ndërpriste shkurtimisht një intervistë të drejtpërdrejtë televizive pasi pësoi atë që më vonë e përshkroi si probleme stomaku.
Erdogan, 69 vjeç, u kthye më vonë për të përfunduar intervistën, në të cilën ka thënë se fushata intensive zgjedhore i kishte shkaktuar atij disa probleme “serioze” me stomakun.
Për shkak të një virusi të zorrëve, Erdogan shtyu fjalimet e fushatës në tre provinca të Anadollit qendror të mërkurën, dy javë përpara zgjedhjeve presidenciale më 14 maj.
Pas një mungese katër ditore, presidenti turk u shfaq në panairin aeronautik Teknofest në aeroportin e vjetër Ataturk në Stamboll, ku industria ushtarake turke ekspozoi drone dhe avionë.
Zgjedhjet parlamentare dhe presidenciale të 14 majit konsiderohen si testi më i vështirë për qeverisjen 20-vjeçare të Erdoganit.
Blloku i bashkuar i opozitës po përpiqet ta rrëzojë atë mes një krize serioze ekonomike dhe pakënaqësisë në rritje për miliona refugjatë në vend.
Kandidati i përbashkët i opozitës për president, Kemal Kiliçdaroglu, i uroi Erdoganit shërim të shpejtë të mërkurën.
Turkish President Erdogan speaking at Teknofest says Azerbaijani President Aliyev promised construction of 1,000 houses in epicentre of #TurkiyeQuakes Kahramanmaras province pic.twitter.com/abrkCtjdNl
— TRT World (@trtworld) April 29, 2023
