Papa Leoni XIV bëri vizitën e tij të parë në një xhami që nga zgjedhja e tij, dhe megjithëse hoqi këpucët si një shenjë respekti, ai nuk u duk se kishte kryer ndonjë lutje.
Të shtunën, Papa vizitoi Xhaminë e Kaltër në Stamboll, e ndërtuar në shekullin e 17-të, e që njihet si kryevepër arkitekturore e periudhës osmane, me pllaka qeramike turke mbi muret dhe kupolën.
I shoqëruar nga liderë lokalë myslimanë, Papa eci nëpër oborrin e xhamisë dhe, pasi hoqi këpucët, iu tregua për brendësinë e saj duke qëndruar vetëm me çorapet e bardha.
Papa i parë amerikan, i cili është gjithashtu një tifoz i zjarrtë i ekipit të bejsbollit Chicago White Sox, së fundmi kishte bërë shaka duke thënë se gjithmonë mban “çorape të bardha”, raporton CNN.
Aşgın Tunca, myezin që e kishte shoqëruar gjatë vizitës, tha se Papa ishte ftuar të lutej gjatë vizitës së tij. Myezini është personi që thërret besimtarët myslimanë për lutje.
“I ofrova që, nëse do të donte, të lutej këtu, por ai tha ‘jo, vetëm dua të shoh’”, tha Tunca, duke sqaruar se atyre u ishte thënë se Papa do të lutej në xhami.
U krijua më tej konfuzion kur zyra e shtypit e Vatikanit dërgoi një komunikatë pas vizitës, duke thënë se Papa ishte lutur në xhami dhe se ishte mirëpritur nga kreu i organit fetar të shtetit turk, pavarësisht se asnjë nga këto nuk kishte ndodhur. Vatikani më vonë sqaroi se deklarata, që përmendte se Papa kishte bërë “një moment të shkurtër lutjeje”, ishte dërguar gabimisht dhe ishte marrë nga broshura e përgatitur para udhëtimit.
Papa Leoni është i treti që viziton Xhaminë e Kaltër. Vizitat e mëparshme papale kishin ngjallur diskutime nëse Papa do të lutej aty.
Në vitin 2014, Papa Françesku kaloi dy minuta në lutje të heshtur gjatë vizitës së tij në xhami, ndërsa në vitin 2006, Papa Benedikti XVI bëri atë që Vatikani e përshkroi si një moment “meditimi të heshtur,” të cilin disa e panë si herën e parë që një papa kishte kryer lutje në një vend mysliman.
Pas vizitës së Leonit, Vatikani deklaroi se Papa “vizitoi xhaminë në heshtje, në një frymë reflektimi dhe dëgjimi, me respekt të thellë për vendin dhe besimin e atyre që ishin mbledhur aty për lutje”.
Papa i parë që vizitoi një xhami ishte Gjon Pali II, i cili vizitoi një të tillë në Siri në vitin 2001. Gjatë gjashtë dekadave të fundit, Kisha Katolike ka pasur dialog aktiv me botën myslimane.
Së fundi, Papa Leoni shënoi 60-vjetorin e një deklarate të rëndësishme kishtare mbi bashkëpunimin ndërfetar, ku morën pjesë qindra liderë fetarë në Vatikan.
Më vonë të shtunën, Leoni u takua privatisht me liderë të kishave lokale kristiane, para se të merrte pjesë në një shërbesë në Kishën Patriarkale të Shën Gjergjit, së bashku me Patriarkun Bartolomeu I, lideri shpirtëror i krishterëve ortodoksë lindorë.