Orbani uron Putinin për fitore në zgjedhje

Kryeministri populist i Hungarisë, Viktor Orban, e ka uruar presidentin rus, Vladimir Putin, për fitoren e tij në zgjedhjet, rezultatet e të cilave nuk janë vënë në dyshim asnjëherë, pas goditjeve sistematike ndaj disidentëve.

Orbani i cili shihet gjerësisht si aleati më i afërt i Putinit në Bashkimin Evropian, i ka dërguar atij një letër urimi të enjten, pas publikimit të rezultateve përfundimtare të zgjedhjeve në Rusi, ka bërë të ditur shefi për media i zyrës së tij, raportoi AP.

Udhëheqësi hungarez është kreu i vetëm i një vendi të BE-së që uroi Putinin për rizgjedhjen e tij, gjë që do të zgjasë sundimin e tij gati çerekshekullor të Rusisë me gjashtë vjet të tjerë.

Fitorja dërrmuese e Putinit u kritikua gjerësisht nga udhëheqësit perëndimorë, të cilët e karakterizuan rezultatin si të paracaktuar në sistemin politik represiv të Rusisë. BE-ja kritikoi zgjedhjet se po zhvillohen në një “mjedis shumë të kufizuar të përkeqësuar edhe nga lufta e paligjshme e agresionit të Rusisë kundër Ukrainës”.