Kryeministri hungarez Viktor Orban ka thënë se do të jetë e nevojshme të zhvillohen më shumë bisedime mes grupeve parlamentare përpara se deputetët të votojnë për ratifikimin e kërkesës së Finlandës dhe Suedisë për anëtarësim në NATO.
Orban ka deklaruar se disa deputetë kanë probleme me Finlandën dhe Suedinë, sepse ata “përhapin gënjeshtra” për gjendjen e demokracisë dhe sundimin e ligjit në Hungari dhe se disa përfaqësues hungarezë i kanë inat.
Në një deklaratë për radion publike, Orban ka thënë se u kishte kërkuar ligjvënësve nga partia e tij Fidesz që të mbështesin kërkesën e dy vendeve nordike, por se ka ligjvënës që nuk janë aq entuziastë për zgjerimin e aleancës ushtarake dhe po kërkojnë diskutime shtesë.
Parlamentet e të 30 anëtarëve të NATO-s duhet të ratifikojnë çdo anëtarësim të ri në aleancë. Sipas njoftimeve, përfaqësuesit hungarezë pritet të votojnë për anëtarësimin e Finlandës dhe Suedisë më 6 mars.
Orban ka thënë se duhet ta bëjë të qartë se Hungaria mbështet Finlandën dhe Suedinë, por duhet të dëgjojë edhe kundërshtimet e Turqisë për hyrjen e Suedisë.
“Sa i përket Turqisë, ajo është gjithashtu aleati ynë dhe prandaj duhet të dëgjojmë se çfarë ka për të thënë”, ka thënë Orban.
Edhe
Hungaria do ta ratifikojë vitin e ardhshëm anëtarësimin e Finlandës e Suedisë në NATO
Ai mendon se duhet gjetur një zgjidhje për kundërshtimet turke, sepse në të kundërtën e gjithë zgjerimi mund të dështojë.
Hungaria e arsyeton vonesën e ratifikimit edhe me mosmarrëveshjen me Brukselin për fondet evropiane.
Vetëm Hungaria dhe Turqia nuk kanë ratifikuar në parlamentet e tyre anëtarësimin e Finlandës dhe Suedisë në NATO.
