Nga java tjetër, SHBA-ja kufizon udhëtimet hyrëse me Indinë

Presidenti i Shteteve të Bashkuara të Amerikës, Joe Biden, ka në plan të kufizojë udhëtimet hyrëse nga India pasi vendi përballet me një rritje katastrofike në rastet me COVID-19, njoftoi Shtëpia e Bardhë të premten.

"Me këshillën e Qendrave për Kontrollin dhe Parandalimin e Sëmundjeve, Administrata do të kufizojë udhëtimin nga India duke filluar menjëherë. Politika do të zbatohet pas rasteve të shumta me COVID-19 dhe varianteve të shumta që qarkullojnë në Indi", ka thënë sekretari i shtypit i Shtëpisë së Bardhë, Jen Psaki, në një deklaratë.

Ndalimi do të hyjë në fuqi të martën, 4 maj.

Vendimi do të bllokojë shumicën e shtetasve jo-amerikanë të cilët kanë qenë në Indi brenda 14 ditëve të fundit nga hyrja në Shtetet e Bashkuara, ka thënë Shtëpia e Bardhë. Banorët e përhershëm të SHBA-së, anëtarët e familjes, punëtorët humanitarë dhe grupe të tjera specifike do të lejohen të hyjnë në territorin amerikan.

India aktualisht po kalon në një rritje të jashtëzakonshme të infeksioneve me COVID-19. Për nëntë ditët e fundit, vendi ka pasur të paktën 300.000 raste të reja në ditë. Vetëm në 24 orët e fundit, 3.498 njerëz kanë vdekur, duke e çuar numrin e përgjithshëm të vdekjeve në 208.330.

Kriza ka vendosur presion të paparë mbi burime të tilla si ilaçet kritike, shtretërit spitalorë, pajisjet e oksigjenit dhe plazma e gjakut. Nevoja është aq e tmerrshme sa India ka njoftuar se do të pranojë ndihmë të huaja - diçka që nuk e kishte bërë në 16 vitet e fundit.