Disa zona të Holandës, përfshirë Amsterdamin, janë prekur nga ndërprerje të mëdha të transportit hekurudhor, teksa dyshohet për sabotim të shinave, ka njoftuar operatori hekurudhor i vendit.
ProRail ka paralajmëruar se pasagjerët në qendër dhe në veri të vendit duhet të përgatiten për anulime dhe vonesa gjatë së martës, ndërsa pati edhe probleme funksionimi në disa vendkalime hekurudhore.
Sipas mediave lokale, në disa pika të ndryshme ishin vendosur tuba mbi shina. Në një deklaratë, ProRail ka thënë se incidenti dukej të ishte "një ndërprerje e qëllimshme... e shkaktuar nga veprimi njerëzor".
Kompania ka shtuar se nuk janë identifikuar ende të dyshuar apo motive, por njësia kombëtare e policisë po heton rastin.
Faqja e internetit e rrjetit ka treguar se të martën janë regjistruar 15 ndërprerje në të gjithë vendin, duke prekur gjithashtu linjat drejt aeroportit kryesor ndërkombëtar, Schiphol, dhe drejt Utrecht-it.
"Në disa pika të shinave u gjetën materiale që ishin vendosur aty qëllimisht. Kjo shkakton keqfunksionime në segmente të caktuara. Duket se bëhet fjalë për sabotim", ka deklaruar ProRail.
Pamjet e publikuara të martën nga transmetuesi publik holandez NOS tregonin policinë duke larguar nga shinat hekurudhore në Veenendaal, Holanda qendrore, objekte që dukeshin si tuba metalikë, me gjatësi rreth 1,5 metra.