Mijëra spanjollë marshuan në qendër të Madridit të shtunën për të protestuar kundër ligjit të amnistisë për separatistët katalanas që morën pjesë në luftën e dështuar për pavarësinë e vitit 2017.
Partia e Punëtorëve Socialistë (PSOE) në pushtet në Spanjë arriti marrëveshje me dy parti nacionaliste katalanase të enjten. Projektligji pritet të miratohet nga parlamenti më vonë këtë muaj.
Projektligji i amnistisë ka nxitur një seri protesteash të mëdha pasi kundërshtohet nga Partia Popullore Konservatore (PP), e djathta ekstreme Vox dhe disa degë të Partisë Socialiste.
“Për sa i përket Vox-it, nuk do të ketë paqe për këtë qeveri”, u tha gazetarëve në Madrid, Santiago Abascal, kryetari i Vox-it, gjatë protestës të së shtunës, ku protestuesit valëvitnin flamuj kombëtarë dhe kënduan këngë patriotike.
Socialistët paraqitën projektligjin për amnistinë në këmbim të mbështetjes për mandatin e ri të kryeministrit Pedro Sanchez nga dy parti separatiste katalanase.
Amnistia do t’i mbulonte të gjitha përpjekjet e Katalonjës për pavarësi që nga viti 2011, duke përfshirë votimin simbolik të mbajtur më 2014 dhe referendumin për pavarësinë më 2017, të cilin gjykatat e shpallën të paligjshme.
