Zinxhiri i ushqimit të shpejtë, McDonald’s Corporation ka marrë vendim për të mbyllur përkohësisht zyrat e tij në Shtetet e Bashkuara të Amerikës këtë javë, pasi përgatitet t’i informojë punonjësit e korporatave për pushimet nga puna si pjesë e një ristrukturimi më të gjerë të kompanisë, raportoi “Wall Street Journal”.
Në një email të brendshëm javën e kaluar për punonjësit amerikanë dhe disa nga stafi ndërkombëtar, McDonald's u kërkoi atyre të punonin nga shtëpia nga e hëna deri të mërkurën, në mënyrë që të mund të jepte vendimet e personelit virtualisht, shkruan Reuters. Është e paqartë se sa punonjës do të pushohen nga puna.
"Gjatë javës më 3 prill, ne do të komunikojmë vendimet kryesore që lidhen me rolet dhe nivelet e personelit në të gjithë organizatën", tha kompania me bazë në Çikago.
McDonald's gjithashtu u kërkoi punonjësve të anulonin të gjitha takimet personale me shitësit dhe palët e tjera të jashtme në selinë e tij.
Kjo kompani ka thënë në janar se do të rishikonte nivelet e stafit të korporatave si pjesë e një strategjie të përditësuar biznesi, e cila mund të çojë në pushime nga puna në disa zona dhe zgjerim në të tjera.
McDonald's pritet të fillojë të shpallë vendimet kryesore të hënën.