Mbi gjysma e Afganistanit tani në duart e talebanëve

Një zyrtar i Bashkimit Evropian, i cili ka folur për agjencinë e lajmeve Reuters nën kushtin e anonimitetit, ka thënë se militantët tani kanë nën kontroll 65 për qind të Afganistanit, si rezultat i një sërë operacioneve ushtarake të ndërmarra në kohën e tërheqjes së forcave të huaja nga vendi

Militantët talebanë kanë shtrënguar lakun përreth Afganistanit, duke thelluar kontrollin mbi territorin e vendit derisa civilët po strehohen përbrenda shtëpive të tyre.

Një zyrtar i Bashkimit Evropian, i cili ka folur për agjencinë e lajmeve Reuters nën kushtin e anonimitetit, ka thënë se militantët tani kanë nën kontroll 65 për qind të vendit, si rezultat i një sërë operacioneve ushtarake të ndërmarra në kohën e tërheqjes së forcave të huaja nga Afganistani.

Pul-e-Khumri, kryeqytet i krahinës veriore Baghlan ka rënë në duart e talebanëve të martën mbrëma, kanë thënë banorët që raportuan se forcat afgane të sigurisë janë tërhequr drejt shkretëtirës Kelagi, ku ndodhet një bazë e madhe ushtarake. Kësisoj, Pul-e-Khumri është bërë kryeqyteti i shtatë rajonal që është vënë në kontrollin e talebanëve brenda vetëm një jave, megjithëse Shtëpia e Bardhë ka njoftuar të martën se Shtetet e Bashkuara të Amerikës nuk e shohin si të pashmangshëm zaptimin e të gjithë vendit nga talebanët.

Presidenti Ashraf Ghani u ka bërë thirrje të fuqive rajonale që ta mbështesin Qeverinë e tij, përderisa një zyrtar i OKB-së, sipas raportimit të Reutersit, ka thënë se përparimet e shënuara në rrafshin e të drejtave të njeriut, 20 vjet pasi që islamikët u rrëzuan nga pushteti, rrezikojnë që të zhbëhen.

Në kryeqytetin Kabul, ndihmës të Ghanit kanë thënë se ai ka kërkuar ndihmën e grupeve rajonale militante, me të cilat ka pasur përplasje për vite të tëra, për mbrojtjen e Qeverisë së tij. Ai gjithashtu u ka bërë thirrje civilëve që ta mbrojnë “materien demokratike” të Afganistanit.

Edhe Botë 15 shk 2022 Afganët, nën talebanët, më të sigurt, më të varfër dhe më të pashpresë

Talebanët, në betejë për të mposhtur qeverinë e përkrahur nga SHBA-ja dhe për rizbatimin e ligjit strikt islamik në kohën e ngecjes së bisedimeve paqësore, kanë marrë nën kontroll të hënën edhe Aibakun, dhe atë me fare pak rezistencë.

“Forcat talebane kësisoj kanë nën kontroll tani 65-përqindëshin e territorit afgan, janë duke i kërcënuar edhe 11 kryeqytete krahinore dhe po përpiqen që t’ia shkurtojnë Kabulit mbështetjen tradicionale nga forcat kombëtare në veri”, ka thënë për Reutersin një zyrtar i lartë i BE-së.

Qeveria ka tërhequr forcat nga lagjet rurale vështirë të mbrojtshme, për t’u përqendruar në ruajtjen e qendrave të mëdha, përderisa zyrtarët kanë insistuar në presionin e Pakistanit fqinj për ta ndaluar përforcimin e talebanëve, si dhe të furnizimeve që kalojnë nëpërmjet kufirit. Nga ana e tij, Pakistani mohon se po i mbështet talebanët.

Në Washington, sekretarja e Shtëpisë së Bardhë për media, Jen Psaki, ka thënë se administrata e presidentit Joe Biden ende mendon se vetëm negociatat mund të sjellin paqen e qëndrueshme dhe stabilitetin në Afganistan.

Edhe Botë 15 shk 2022 Për gjashtë muaj nën regjimin e ri, afganët, më të sigurt e më të pashpresë

“Tekefundit, qëndrimi ynë është se forcat kombëtare të sigurisë në Afganistan kanë pajisjet, numrat dhe trajtimin e duhur për t’u kundërpërgjigjur, gjë kjo që do ta fuqizojë pozitën e tyre në tryezën e negociatave”, ka thënë Psaki në konferencën e rregullt për gazetarë. “Presidenti Biden vazhdon të besojë se nuk është e pashmangshme që talebanët të zaptojnë Kabulin apo vendin”, ka raportuar Reuters.

Shtetet e Bashkuara do ta kompletojnë tërheqjen e forcave nga vendi deri në fund të këtij muaji, si pjesë e marrëveshjes me talebanët, që përfshin largimin e forcave të huaja në këmbim të zotimit të talebanëve për ta pamundësuar përdorimin e Afganistanit për terrorizëm ndërkombëtar. Nën këtë marrëveshje, talebanët kanë premtuar që të mos i sulmojnë forcat e huaja gjatë tërheqjes, porse nuk janë dakorduar për armëpushim me trupat qeveritare.