Agjencia evropiane e policisë ka nisur një fushatë për të kapur kriminelet më të kërkuara në kontinent.
Ueb-faqja e re e Europol-it, e quajtur “Crime Has No Gender” (Krimi nuk ka gjini), zbulon fytyrat e të arratisurve të kërkuar nga 21 shtete të BE-së në një mënyrë interaktive. Tetëmbëdhjetë nga ta janë gra.
“Njerëzit mendojnë se këto krime zakonisht nuk kryhen nga gratë, por po, dhe janë po aq serioze sa krimet e kryera nga burrat”, thotë Tine Hollevoet, zëdhënëse në Europol, raporton "The Guardian".
Të arratisurit e kërkuar përballen me një varg akuzash, përfshirë vrasje dhe trafikim me njerëz e me drogë, transmeton Koha.net.
Fushata interaktive fillimisht i shfaq të dyshuarit prapa maskave, para se t’u zbulohen fytyrat ngadalë teksa lexuesit lexojnë storiet prapa krimeve të tyre.
Edhe
Bandat kriminale në BE po depërtojnë në bizneset legale, thotë Europoli
“Sa herë që lexuesi shkon poshtë duke e lexuar faqen, fytyra e të arratisurit të kërkuar zbulohet dhe do të jenë në gjendje të shohin se a është burrë apo grua”, ka thënë Hollevoet.
“Ideja është që të tërheqim sa më shumë vizitorë që të jetë e mundur, ndërsa përvoja na ka treguar se sa më shumë njerëz që i shohin të arratisurit e kërkuar, shanset janë po aq më të mëdha për të gjetur dhe arrestuar personin e kërkuar”.
Franca po e kërkon Jessica Edosomwan, shtetase nigeriane e cila u arratis teksa policia bastisi një rrjet prostitucioni në rajonin e Lionit në fund të vitit 2007 dhe arrestoi 26 persona.
Rrjeti zbuloi 60 prostituta të cilat u tërhoqën në Francë me premtimin për një të ardhme më të mirë dhe u trafikuan atje përmes Libisë.
Posa shkonin në Francë, gratë e shkreta u nënshtroheshin Voodoo ritualeve “juju” dhe familjet e tyre kërcënoheshin, ka thënë policia franceze.
E dyshuara Edosomwan besohet të jetë ose në shtetet e Beneluksit, ose në Itali apo Gjermani, ka thënë policia.
Një e dyshuar tjetër është shtetasja hungareze Ildikó Dudás, 31 vjeçe, e cila kërkohet për trafikim me drogë dhe për abuzim me fëmijë.
Edhe
Varre pa emra
“Shumës shpesh fëmijët e të dyshuarës ishin sjellë në transaksione me drogë”, ka thënë Europol për Dudás.
Dudás ishte dënuar me gjashtë vjet burgim për krimet e kryera mes 2011 dhe 2012 por vendndodhja e saj është e panjohur.
