Kremlini ka thënë të hënën se është e vështirë të mos pajtohesh me ekspertët që thonë se presidenti amerikan, Donald Trump, do të hynte në histori të Shteteve të Bashkuara dhe të botës, nëse do të merrte kontrollin e Grenlandës.
Zëdhënësi i Kremlinit, Dmitry Peskov, ka thënë se nuk po diskutonte nëse një hap i tillë do të ishte i mirë apo i keq, por thjesht po konstatonte një fakt.
Trumpi ka këmbëngulur vazhdimisht se nuk do të pranojë asgjë më pak se pronësinë e Grenlandës, një territor autonom i Danimarkës. Ai ka thënë se nëse Shtetet e Bashkuara nuk marrin kontrollin e Grenlandës, atëherë këtë do ta bëjnë Rusia ose Kina.
I pyetur të komentojë deklaratat e Trumpit për kërcënimin e supozuar rus, Peskov ka thënë se kohët e fundit ka pasur shumë “informacione shqetësuese”, por se Kremlini nuk do të komentojë mbi planet e supozuara ruse për Grenlandën.
“Këtu, ndoshta, është e mundur të abstrahohemi nga pyetja nëse kjo është e mirë apo e keqe, nëse do të përputhej apo jo me parametrat e së drejtës ndërkombëtare”, ka thënë Peskov.
“Ka ekspertë ndërkombëtarë që besojnë se, duke zgjidhur çështjen e përfshirjes së Grenlandës, Trumpi me siguri do të hyjë në histori. Dhe jo vetëm në historinë e Shteteve të Bashkuara, por edhe në historinë botërore”, ka shtuar ai.
Edhe
Putini e vlerëson Grenlandën me 1 miliard dollarë
Udhëheqësit si të Danimarkës ashtu edhe të Grenlandës kanë këmbëngulur se ishulli nuk është në shitje dhe nuk dëshiron të bëhet pjesë e Shteteve të Bashkuara.
Ministria e Jashtme e Rusisë ka thënë javën e kaluar se është e papranueshme që Perëndimi të vazhdojë të pretendojë se Rusia dhe Kina kërcënojnë Grenlandën, duke shtuar se kriza rreth territorit tregon standardet e dyfishta të fuqive perëndimore, të cilat pretendojnë epërsi morale.
