-
Përktheu:
Flutura Gashi-Mehmeti
- 11 gusht 2026 16:18
- Shpërndaje në:
Operacionet e kërkim-shpëtimit kanë rifilluar të martën në dhjetëra qytete dhe qyteza në Kolumbinë perëndimore, pasi tërmeti me magnitudë 7.4 të hënën ka lënë më shumë se 3,000 persona të zhdukur, ndërsa shumë prej tyre dyshohet se kanë mbetur të bllokuar nën rrënoja.
Kryetarët e bashkive dhe guvernatorët e Kalit, Pereira-s, Çokos dhe Manizalesit, kanë thënë se të paktën 179 persona kishin vdekur në këto katër zona, teksa qeveria qendrore, e cila ka përditësuar për herë të fundit të dhënat të hënën, ka thënë se të paktën 111 persona kanë humbur jetën.
Rreth 1,600 ndërtesa janë raportuar të dëmtuara ose të shembura.
Ushtarë, pjesëtarë të ekipeve të shpëtimit dhe familjarë kërkonin mes rrënojave, duke kaluar me dorë copa të mëdha betoni nga njëri vullnetar te tjetri, përgjatë rreshtave të krijuar për nxjerrjen e mbetjeve.
Çoko, rajoni që rrethon epiqendrën e tërmetit, është një nga zonat më të varfra dhe më të neglizhuara të Kolumbisë, e cila shpesh përballet me përleshje mes grupeve të armatosura. Në pjesën më të madhe të Çokos mund të shkohet vetëm me varkë, përmes xhunglës ose me avion. Përmasat e dëmeve në këtë rajon ende nuk dihen plotësisht.
Presidenti i ri i vendit, Abelardo De la Espriella, ka udhëtuar të hënën në mbrëmje drejt kryeqytetit të Çokos, Kivdo, dhe ka njoftuar se kishte mobilizuar “të gjithë aparatin ushtarak dhe policor” për t’u përballur me situatën, duke dërguar inxhinierë, ekipe shpëtimi dhe qen të trajnuar për kërkime.
“Çoko nuk do të jetë më kurrë ‘vendi i të harruarve’”, ka deklaruar ai.
Tërmeti përbën testin e parë të madh për de la Espriellën, i cili ka bërë betimin të premten. De la Espriella është parë si një figurë përçarëse për shkak të premtimit të tij për një goditje të gjithanshme ndaj grupeve kriminale në këtë vend të Andeve.
Ndërkohë, familjet kanë publikuar informacione për të afërmit e zhdukur në faqe interneti të krijuara dhe menaxhuara nga qytetarët.
Tërmeti në Kolumbi ka ndodhur pasi një sërë lëkundjesh të njëpasnjëshme kishin shkatërruar vendin fqinj, Venezuelën, në fund të muajit qershor, duke shembur qindra ndërtesa dhe duke shkaktuar vdekjen e më shumë se 6.300 personave.
Mbi 250 të vdekur nga tërmeti në Kolumbi
Photo: Associated Press
Numri i të vdekurve si pasojë e tërmetit të fuqishëm në Kolumbi ka arritur në mbi 250, teksa ekipet e shpëtimit gërmuan të martën nëpër hapësira të mëdha me beton të copëtuar, në një garë me kohën për të gjetur të mbijetuar.
Tërmeti me magnitudë 7.4, më i fuqishmi që ka goditur vendin e Amerikës së Jugut në disa dekada, ka goditur herët të hënën Kolumbisë perëndimore, të njohur për prodhimin e kafesë, duke lënë pallate banimi, shtëpi, shkolla dhe qendra shëndetësore të çara ose tërësisht të shembura.
Në qytetet më të goditura, ekipet e shpëtimit punuan gjatë gjithë natës me vinça, ekskavatorë dhe, në disa raste, edhe me duar, duke prerë çelikun e deformuar në kërkim për njerëzit që mund të kishin mbetur ende të bllokuar.
“Ne jemi... të përqendruar te detyra e menjëhershme për të shpëtuar jetë, për të garantuar mbërritjen e ekipeve të shpëtimit, për të sjellë furnizime mjekësore dhe spitale fushore”, ka thënë ministri i Brendshëm, Rodrigo Lara, për Blu Radio.
Zyra e OKB-së për çështjet humanitare, OCHA, duke iu referuar shifrave zyrtare të së hënës në mbrëmje, ka thënë se 126 persona ishin konfirmuar të vdekur dhe 1,495 të tjerë ishin lënduar.
Por vlerësimet lokale të së martës e vendosën numrin e viktimave në rreth 224.