Një këshilltar i pavarur ka kërkuar dënim me vdekje për ish-presidentin e Koresë së Jugut, Yoon Suk Yeol, për akuza për rebelim në lidhje me vendosjen e përkohshme të gjendjes së jashtëzakonshme në dhjetor 2024.
Gjykata Qendrore e Distriktit të Seulit ka thënë se ekipi i këshilltares së pavarur, Cho Eun-suk, e ka bërë këtë kërkesë gjatë një seance dëgjimore të martën. Yoon pritej të mbante fjalim në atë seancë.
I shkarkuar nga detyra në prill të vitit të kaluar, Yoon përballet me gjykime penale për dështimin e shpalljes së gjendjes së jashtëzakonshme dhe për skandale të tjera që lidhen me kohën e tij në detyrë.
Akuzat se ai ka drejtuar një rebelim janë më të rëndësishmet.
Gjykata pritet të japë vendimin për Yoon në shkurt.
Yoon ka këmbëngulur se dekreti i tij ishte një përpjekje e dëshpëruar, por paqësore, për të rritur ndërgjegjësimin publik rreth asaj që ai e konsideronte rrezik nga Partia Demokratike liberale e opozitës, e cila përdori shumicën e saj parlamentare për të bllokuar agjendën e tij dhe për të ndërlikuar punët shtetërore.
Yoon e ka quajtur parlamentin e kontrolluar nga opozita “një strehë kriminelësh” dhe “forca antishtetërore”.
Por ligjvënësit u mobilizuan me shpejtësi atëkohë për të kundërshtuar shpalljen e gjendjes së jashtëzakonshme në skena dramatike gjatë natës, dhe mjaft prej tyre, përfshirë edhe nga partia në pushtet e Yoon, arritën të hynin në sallën e kuvendit për të votuar kundër dekretit.
Dekreti i Yoon, i pari i këtij lloji në më shumë se 40 vjet në Korenë e Jugut, nxori trupa të armatosura në rrugët e Seulit për të rrethuar parlamentin dhe për të hyrë në zyrat zgjedhore.