-
Nga:
Associated Press
- 5 tetor 2022 11:42
- Shpërndaje në:
"Nxehtësia është e padurueshme", tha Mejilla. "Kur nuk ka energji ... nuk mund të bëjmë ushqim, nuk kemi gaz”. Nëna e saj ka probleme me frymëmarrjen dhe duhej të shkonte në shtëpinë e një shoku që kishte energji elektrike. "Unë mendoj se ata duhet t'ua lëshojnë rrymën njerëzve që janë më në nevojë”
Gati një javë pasi uragani Ian u përplas në Florida dhe shkaktoi shkatërrim gjithandej, duke arritur deri në Karolina, më shumë se gjysmë milioni banorë në mbarë vendin u përballën me një ditë tjetër pa energji elektrike të martën, ndërsa shpëtimtarët vazhduan kërkimin e tyre për të ngujuarit brenda shtëpive të përmbytura nga ujërat.
Të paktën 78 persona janë konfirmuar të vdekur nga stuhia: 71 në Florida, katër në Karolinën e Veriut dhe tre në Kubë që kur Ian arriti në tokë në ishullin e Karaibeve më 27 shtator dhe në Florida një ditë më vonë.
Përpjekjet e kërkimit dhe shpëtimit ende po vazhdojnë në Florida, ku më shumë se 1.600 njerëz janë shpëtuar në mbarë vendin. Por për shumë banorë të Floridës, rikthimi i energjisë është kthyer në sfidë të madhe.
Në qytetin e Napolit, Kelly Sedgwick sapo po shihte imazhet televizive të shkatërrimit që Ian kishte shkaktuar, falë energjisë që u rikthye katër ditë pasi uragani u përplas në komunitetin e saj jugperëndimor të Floridës. Ndërkohë, në qytetin e afërt të Bonita Springs, Catalina Mejilla ishte ende duke përdorur një gjenerator të huazuar për t'i mbajtur fëmijët e saj dhe gjyshin e tyre të qetë, ndërsa prisnin që t'u kthehej energjia. Ian ndërpreu energjinë për 2.6 milionë klientë në të gjithë Floridën.
Që atëherë, ekuipazhet kanë punuar në ethe për të rivendosur infrastrukturën e energjisë elektrike. Zyrtarët shtetërorë thanë se presin që energjia të rikthehet deri të dielën për klientët, linjat e energjisë dhe infrastruktura tjetër elektrike e të cilëve janë ende të paprekura.
Rreth 520.000 shtëpi dhe biznese në Florida ishin ende pa energji elektrike mbrëmjen e së hënës - pothuajse e barabartë me të gjithë klientët në Rhode Island.
Për ata që po u kthehej energjia elektrike ishte bekim. Sedgwick tha se ishte "i lehtësuar" që i kishte rikthyer rryma dhe lavdëroi ekuipazhet për punën e tyre të palodhur: "Ata kanë bërë një punë të jashtëzakonshme".
Por për ata që ende prisnin ishte një pengesë e vështirë.
"Nxehtësia është e padurueshme", tha Mejilla. "Kur nuk ka energji ... nuk mund të bëjmë ushqim, nuk kemi gaz”. Nëna e saj ka probleme me frymëmarrjen dhe duhej të shkonte në shtëpinë e një shoku që kishte energji elektrike. "Unë mendoj se ata duhet t'ua lëshojnë rrymën njerëzve që janë më në nevojë”.
Eric Silagy, shef i Florida Power & Light - ofruesi më i madh i energjisë në shtet - tha se ai i kupton zhgënjimet dhe tha se ekuipazhet po punojnë sa më shumë që të munden për të rikthyer energjinë sa më shpejt të jetë e mundur. Ndërmarrja pret që të rikthehet energjia në 95% të zonave të saj të shërbimit deri në fund të ditës së premte, tha ai.
Një tjetër ofrues i madh i energjisë elektrike në rajonin bregdetar të goditur rëndë - Lee County Electric Cooperative - tha të hënën se pret të arrijë nivelin e 95% deri në fund të së shtunës. Kjo shifër nuk përfshin ishujt si Sanibel, që janë në zonën e tij të shërbimit.