Qeveria gjermane është detyruar të përgjigjet pas ankesave të shumta në rrjetet sociale se çmimi i donerit ka pësuar rritje të papërballueshme për qytetarët, shkruan BILD.
Nëpërmjet një postimi në Instagram, Qeveria e udhëhequr nga Olaf Scholz e ka drejtuar gishtin kah faktorët e jashtëm.
“Shpenzimet më të larta të energjisë dhe ushqimit, si dhe rregullimi i inflacionit në paga dhe furnizime janë shkaku i rritjes së çmimit të donerit”, shkroi qeveria gjermane në Instagram.
Kjo, sipas Qeverisë gjermane, ishte rezultat i “luftës së agresionit të Rusisë ndaj Ukrainës rreth një vit më parë”.
“Qeveria federale po ndihmon sipërmarrësit e vegjël me ulje të çmimit të energjisë. A do të bëhet doneri më i lirë si rezultat i kësaj? Kjo nuk mund të thuhet ende me siguri”, sipas Qeverisë.
Një përdorues iu ankua direkt kancelarit Scholz.
Edhe
Çmimi i naftës i afrohet rekordit, Qeverisë i kërkohet të veprojë
“Ju lutemi, z.Scholz, ulni çmimin e donerit. Unë paguaj 9 euro për një doner – dhe nuk është as organik”, shkroi një përdorues.
“Si student është pothuajse e pamundur të hash një doner çdo ditë. Prandaj kërkoj nga ju që të prezantoni ulje të çmimit të donerit”, shkruan një përdorues tjetër.
“Doner kebab”, një nga ushqimet e shpejta më të njohura në Gjermani, deri në vitin 2022 kushtonte rreth 3.50 euro.
