Furnizimi me gazin rus vazhdon normalisht në vende të tjera, edhe pse s’paguajnë në rubla

Ndërsa Polonia dhe Bullgaria janë të parat në Bashkimin Evropian që iu është ndëprerë furnizimi me gaz rus, ato nuk janë të vetmet vende që kanë refuzuar kërkesën e Moskës që dërgesat të paguhen në rubla - për të cilën Gazpromi thotë se është arsyeja pse e ka ndërprerë furnizimin këtë mëngjes, shkruan BBC.

Vende të tjera raportojnë se po vazhdojnë të marrin gaz normalisht.

Austria, e cila ka vazhduar të paguajë për gazin e saj rus në euro, ka thënë këtë mëngjes se furnizimet po vazhdonin pa kufizime. Ajo merr rreth 80% të gazit të saj nga Rusia.

Në mënyrë të ngjashme, Gjermania gjithashtu ka refuzuar të paguajë për gazin rus në rubla. Mbrëmë rregullatori i rrjetit ka thënë se po monitoronte situatën, por shtoi se siguria e furnizimeve ishte "aktualisht e garantuar".

I vetmi vend i BE-së që ofron të paguajë për gazin rus në rubla është Hungaria. Ministri i Jashtëm i saj ka thënë këtë mëngjes se furnizimet ishin normale, duke shtuar se në maj do të transferonte pagesën e radhës për gazin rus në euro për Gazprombank për ta kthyer më pas në rubla.