-
Përktheu:
Flutura Gashi-Mehmeti
- 22 shtator 2025 10:42
- Shpërndaje në:
Më shumë vende, përfshirë Francën dhe Belgjikën, pritet të njohin shtetin palestinez gjatë një konference të OKB-së më vonë të hënën, pas njoftimeve të djeshme nga Mbretëria e Bashkuar, Kanadaja, Australia dhe Portugalia.
Presidenti i Francës, Emmanuel Macron, është bashkë-organizator i konferencës me Princin e Kurorës së Arabisë Saudite, Mohammed bin Salman, në Nju Jork këtë pasdite.
Fokusi do të jetë në avancimin e një zgjidhjeje me dy shtete midis Izraelit dhe palestinezëve.
Izraeli dhe aleati i tij më i ngushtë, SHBA-ja do të jenë midis një pakice në rënie të anëtarëve të OKB-së që nuk e njohin një shtet palestinez dhe kanë dënuar njoftimet e djeshme.
Presidenti i Autoritetit Palestinez, Mahmoud Abbas, pritet të marrë pjesë në konferencë virtualisht, pasi SHBA-ja e ka bllokuar atë dhe 80 zyrtarë të tjerë palestinezë të udhëtonin në OKB këtë vit duke ua mohuar vizat.
Ky veprim vjen një ditë para se udhëheqësit botërorë të mblidhen për fillimin zyrtar të takimit të 80-të vjetor të Asamblesë së Përgjithshme të OKB-së.
Siç është aktualisht, më shumë se tre të katërtat e 193 anëtarëve të OKB-së tashmë e njohin një shtet palestinez.
Macron: Njohja e Palestinës është e vetmja mënyrë për të ofruar zgjidhje politike
Photo: Associated Press
Presidenti francez, Emmanuel Macron, ka thënë se "njohja e shtetit palestinez sot është e vetmja mënyrë për të ofruar një zgjidhje politike për një situatë që duhet të ndalet".
Franca pritet të njohë shtetin palestinez në një konferencë të OKB-së të hënën.
Ai i ka thënë CBS News, se njohja është fillimi i një procesi politik, duke shtuar se menjëherë pas kësaj ai pret një armëpushim, lirimin e të gjithë pengjeve dhe rikthimin e ndihmës humanitare që arrin në Gazë.
Macroni gjithashtu ka thënë se thirrja e tij për njohjen e një shteti palestinez dhe kundërshtimet e tij ndaj luftës së vazhdueshme në Gazë nuk janë antisemite.
Në intervistë, Macroni gjithashtu ka përmendur faktin që ambasadori i SHBA-së në Francë, Charles Kushner - djali i të cilit është i martuar me vajzën e presidentit amerikan Donald Trump, Ivanka e ka akuzuar publikisht atë se nuk po bën mjaftueshëm për të luftuar antisemitizmin në Francë.
Në gusht, Kushner ka thënë gjithashtu se qëndrimi i politikës së jashtme të Francës ishte i ngjashëm me incidentet e brendshme të dhunës kundër popullit hebre në Francë.