Më shumë se 180,000 raste të reja me koronavirus janë regjistruar të dielën në tërë botën, duke shënuar rritjen më të madhe ditore që nga fillimi i pandemisë, sipas OBSH-së.
Agjencia e Shëndetësisë e OKB-së ka thënë se të dielën u regjistruan 183.000 raste të reja brenda 24 orëve, duke çuar totalin e të infektuarve në botë në 8.708.000, shkruan Independent të hënën.
Brazili ishte në krye të listës me 54,771 raste ditore, i përcjell nga SHBA-ja me 36.617 raste të reja. Mbi 15.400 raste erdhën nga India.
Ndërkohë 4.743 persona vdiqën në tërë botën të dielën dhe totali shkoi në 461.715.
Më shumë se dy e treta e vdekjeve u raportua nga kontinenti i Amerikës, që është epiqendra e re e pandemisë, transmeton KOHA.
SHBA-ja ka numrin më të madh të infektimeve të raportuara me mbi 2.3 milionë dhe numrin më të madh të vdekjeve, me afro 120.000.
Rritja e shpejtë e rasteve të reja me COVID-19 është duke ndodhur gjersa shumë shtete nisën të rihapin kufijtë dhe të lirojnë masat e karantinimit, për të ringjallur ekonomitë e shkatërruara.
Edhe
Shifra rekorde të rasteve me koronavirus nëpër botë
Në Afrikën Jugore, presidenti Cyril Ramaphosa lajmëroi se do të hapen kazinotë, sallonet e bukurisë dhe restorantet, pavarësisht numrit të madh prej 5.000 rasteve të reja të regjistruara brenda ditës.
Kina gjithashtu ka shtrënguar kufizimet në Pekin, pasi u raportua për një grup të ri të rasteve dhe u është ndaluar personave të dalin nga ky qytet pos nëse rezultojnë negativ në test. Të dielën u raportuan edhe 25 raste të reja, përfshirë 22 në kryeqytet.
Në Korenë Jugore, afro 200 infektime kanë ardhur nga punëtorët e një kompanie të shitjeve nga dera në derë dhe së paku 70 raste janë lidhur me një klub të ping pongut.
