Serbia filloi një festë të re kombëtare të mërkurën me një shfaqje të fuqisë ushtarake dhe bëri thirrje që të gjithë serbët etnikë në Ballkan të bashkohen nën një flamur, duke shkaktuar shqetësim midis fqinjëve të saj dekada pasi thirrje të ngjashme çuan në luftërat e përgjakshme të viteve 1990.
Serbëve iu tha të shfaqnin mijëra flamuj kombëtarë të kuq, blu dhe të bardhë kudo që jetojnë në rajon ose në botë për të shënuar "Ditën e Bashkimit të Serbëve, Lirisë dhe Flamurit Kombëtar".
Duke hapur ditën e festimeve, presidenti Aleksandër Vuçiq inspektoi pajisjet ushtarake të ekspozuara në një park të Beogradit, duke vlerësuar gatishmërinë e ushtrisë për t'iu përgjigjur kërcënimeve të jashtme, raporton AP.
Ai tha se ushtria është "pesë herë më e fuqishme" sesa vetëm disa vjet më parë, dhe njoftoi blerje të reja ushtarake.
Shfaqja e “muskujve” nga zyrtarët serbë si dhe thirrjet e tyre për krijimin e "Botës Serbe", ose bashkimi politik i rreth 1.3 milion serbëve etnikë që jetojnë në Bosnjë, Mal të Zi, Kosovë dhe Kroaci me Serbinë, kanë shkaktuar shqetësime në vendet fqinje.
Në vitet 1990, forcat serbe me mbështetje financiare dhe politike nga Beogradi drejtuan fushata të përgjakshme në Bosnjë, Kroaci dhe Kosovë me qëllimin për të formuar një "Serbi të Madhe". Fushata u përpoq pa sukses të ridizajnonte kufijtë e brendshëm të ish-Jugosllavisë dhe të krijonte një shtet të vetëm serb.
Denis Beçiroviq, deputet në parlamentin boshnjak, tha se Vuçiq "po rikthen projektin e Serbisë së Madhe" duke mbështetur politikat separatiste të serbëve të Bosnjës.
"Mjerisht, forcat ekspansioniste në Serbi kanë një potencial për të ndezur përsëri të gjithë rajonin", tha Beciroviq. "Perëndimi duhet të ndalojë demonin e Serbisë së Madhe para se të jetë vonë".
Presidenti kroat Zoran Milanoviç tha se ai nuk mund të "besojë se serbët nuk kanë asgjë më të rëndësishme ose më të zgjuar për të bërë" sesa të krijojnë festa që cenojnë punët e brendshme të shteteve fqinje.
Ministri i Brendshëm i Serbisë, Aleksandar Vulin, mbështetësi më i zëshëm i "Botës Serbe", u përgjigj shpejt.
"Nuk ka asgjë më të rëndësishme sesa ruajtja e identitetit serb", tha ai.
Festa e re kombëtare përkon me një fitore kryesore serbe dhe franceze më 1918 kundër Fuqive Qendrore në Ballkan, të operacioneve gjatë Luftës së Parë Botërore.
