Dhjetëra të arrestuar e të lënduar nga protestat në Greqi

Janë arrestuar të paktën 41 persona dhe rreth 20 janë lënduar gjatë përleshjeve të protestuesve me Policinë greke jashtë objektit të Parlamentit në Athinë.

Protesta që ka nisur si paqësore në dyvjetorin e aksidentit hekurudhor ku vdiqën 57 persona u kthye në protestë të dhunshme. Protestuesit hodhën gurë e molotov në drejtim të policëve, teksa këta të fundit gjuajtën gaz lotsjellës për të shpërndarë turmat e njerëzve.

Përveç Athinës, mijëra qytetarë kanë protestuar edhe ne qytete të tjera për të kërkuar drejtësi për vdekjen e 57 personave. Ata kanë akuzuar Qeverinë greke për mungesë transparence në zbardhjen e rastit, raportoi AP. Aksidenti i 2023-s konsiderohet si më i rëndi në historinë e Greqisë.

Autoritetet greke kanë thënë se afërsisht 300,000 njerëz kanë marrë pjesë në protestat përreth Greqisë.