DASH-i ndalon përkohësisht fondet shtesë për agjencinë e OKB-së

Departamenti Amerikan i Shtetit ka ndaluar përkohësisht fondet shtesë për Agjencinë e OKB-së për ndihmën dhe punën për refugjatët në Palestinë dhe Lindjen e Mesme, mes akuzave se disa punonjës janë përfshirë në sulmin e Hamasit ndaj Izraelit.

Zëdhënësi i DASH-it, Matt Miller, tha se duhet një hetim i plotë dhe i shpejtë për këtë çështje.

“Sekretari i Shtetit Antony J. Blinken foli me Sekretarin e Përgjithshëm të Kombeve të Bashkuara, Antonio Guterres, më 25 janar për të theksuar domosdoshmërinë e një hetimi të plotë dhe të shpejtë të kësaj çështjeje. Ne mirëpresim vendimin për të kryer një hetim të tillë dhe zotimin e Sekretarit të Përgjithshëm Guterres për të ndërmarrë veprime vendimtare për t'u përgjigjur, nëse pretendimet rezultojnë të sakta”, tha Miller.

Miller, mes tjerash, shtoi se SHBA-ja ka kontaktuar qeverinë izraelite për më shumë informacion rreth akuzave dhe ka informuar anëtarët e Kongresit, raportoi CNN. 

Departamenti mirëpriti gjithashtu njoftimin e OKB-së për një rishikim gjithëpërfshirës dhe të pavarur të agjenicsë për ndihmë dhe punë për refugjatët në Palestinë dhe Lindjen e Mesme.

"UNRWA luan një rol kritik në ofrimin e ndihmës për shpëtimin e jetëve për palestinezët, duke përfshirë ushqimin thelbësor, ilaçet, strehimin dhe mbështetje të tjera jetike humanitare. Puna e tyre ka shpëtuar jetë dhe është e rëndësishme që UNRËA të adresojë këto pretendime dhe të marrë masat e duhura korrigjuese, duke përfshirë rishikimin e politikave dhe procedurave ekzistuese”, tha zëdhënësi i DASH-it.