Borrell pas takimit me Zaevin: Maqedonia e Veriut mund t’i nisë negociatat për anëtarësim

Përfaqësuesi i lartë i BE-së për politika e jashtme, Josep Borrell, është takuar me kryeministrin e Maqedonisë Veriore, Zoran Zaev, për të diskutuar për përparimin e vendit në rrugën drejt BE-së. 

Pas takimit Borrell ka thënë se Maqedonia e Veriut ka plotësuar kushtet “për të filluar negociatat për anëtarësim” dhe ka pranuar “nivelin e lartë të rreshtimit” që Maqedonia e Veriut ka marrë në lidhje me “politikën e jashtme dhe të sigurisë” të BE-së, raporton AP. 

Zaev ka theksuar përkushtimin e vendit të tij për “vlerat e përbashkëta” me BE-në dhe mbi “zbatimin e standardeve dhe kritereve të BE-së” dhe ka thënë se BE-ja ka konfirmuar dhe pranuar që nga marsi i vitit 2020 se Maqedonia e Veriut ka plotësuar obligimet dhe tash është koha që BE-ja të jap rezultate.

Në tetor, komisioneri i BE-së për zgjerim Oliver Varhelyi i kërkoi Qeverisë së Maqedonisë së Veriut që të intensifikojë procesin e reformave, një parakusht kyç për synimin e vendit që t’i bashkohet BE-së.

Blloku dëshiron të shoh më tepër përparim në çështjet e lidhura me sundimin e ligjit, korrupsionin dhe reformimin e gjyqësorit.