Zyrtarët e lartë amerikanë kanë mbërritur në Meksikë, derisa presioni mbi Shtëpinë e Bardhë po rritet për të adresuar nivelet masive të migrimit në kufirin jugor.
Sekretari i Shtetit, Antony Blinken ka udhëhequr delegacionin amerikan për të takuar presidentin meksikan Andres Manuel Lopez Obrador.
Samiti do të fokusohet në mënyrat për të frenuar atë që Departamenti i Shtetit e quajti “emigrim të parregullt të paparë”.
Kjo vjen pasi pikat kufitare me SHBA-në kanë parë rritje të emigrantëve deri në 10.000 njerëz në ditë.
Në një telefonatë në fillim të kësaj jave, Lopez Obrador dhe presidenti Joe Biden ranë dakord se nevojiteshin veprime urgjente për të adresuar sigurinë kufitare. Lopez Obrador u tha gazetarëve pas thirrjes se Meksika “do të ndihmojë, siç bëjmë gjithmonë ne” për të trajtuar fluksin e emigrantëve në SHBA.
“Tani kemi një situatë të jashtëzakonshme sepse numri i emigrantëve që kalojnë nëpër vendin tonë me qëllim që të arrijnë në Shtetet e Bashkuara është rritur”, tha Lopez Obrador.
Në një deklaratë në fillim të kësaj jave, Departamenti i Shtetit tha se takimi në Mexico City, i cili do të përfshijë gjithashtu Sekretarin e Sigurisë Kombëtare, Alejandro Mayorkas, do të fokusohet në “migrimin e parregullt të paparë në hemisferën perëndimore dhe të identifikojë mënyrat” se çdo vend mund të adresojë sfidat e sigurisë kufitare.
Por takimi i së mërkurës vjen pasi një numër rekord i emigrantëve kalojnë në SHBA nga Meksika. Numri i personave të kapur në kufirin jugor të SHBA-së i kaloi dy milionë, si në vitin fiskal 2022 ashtu edhe në vitin 2023.
Zyrtarët e Doganave dhe Mbrojtjes së Kufirit të SHBA-së (CBP) thanë në një deklaratë të premten se kishte më shumë se 190,000 arrestime vetëm në nëntor.