Sekretari amerikan i shtetit Antony Blinken ka njoftuar se ka anuluar takimin me ministrin e Jashtëm të Rusisë, Sergei Lavrov, takim ky i paraparë të mbahet të enjten.
Blinken ka thënë se pas ngjarjeve të 24 orëve të fundit më nuk ka kuptim të mbahet ky takim dhe se e ka njoftuar Lavrovin për këtë.
“Tash që po shohim se pushtimi i Ukrainës nga Rusia ka nisur, dhe Rusia ka bërë të qartë refuzimin e diplomacisë, nuk ka kuptim të shkohet para me këtë takim”, ka thënë Blinken në konferencë për media pas takimit me ministrin e Jashtëm të Ukrainës, Dmytro Kuleba.
Blinken i sheh shqetësuese deklarimet e presidentit të Rusisë, Vladimir Putin.
“Putin me deklaratat e tij sot ia ka bërë të qartë botës se si e sheh Ukrainën, jo si shtet të pavarur, por si krijim të Rusisë”, ka thënë Blinken.
Ai ka thënë se Putin me veprimet e tij ka shkelur një mori të marrëveshjes ndërkombëtare.
Ai ka shtuar se Evropa është në rrezikun më të madh që nga Lufta e Dytë Botërore.
Blinken ka shtuar se Putin me veprimet e tij e ka bërë të qartë se kurrë nuk e kishte problemin te mundësia e anëtarësimit të Ukrainës në NATO.
Ai ka thënë se Putin me sjelljet e tij po do ta rikrijojë Perandorinë Ruse, apo të krijojë sferën e ndikimit.
“Çështja e Ukrainës në NATO ishte thjeshtë pretekst për të maskuar faktin që ka të bëjë me vetë pikëpamjen e Putinit për Ukrainën, që nuk e sheh atë si shtet të pavarur”, ka thënë Blinken.