Bisedimet SHBA-Iran përfundojnë pa marrëveshje, por ka shenja përparimi

Shtetet e Bashkuara të Amerikës dhe Irani kanë bërë përparim në bisedimet për programin bërthamor të Teheranit, thanë ndërmjetësit e Omanit të enjten.

Megjithatë, pas disa orësh negociata, nuk u arrit një marrëveshje përfundimtare që do të shmangte goditje të mundshme ushtarake nga SHBA-ja, në një kohë kur forcat amerikane janë shtuar ndjeshëm në rajon, raporton Reuters.

Të dyja palët pritet të rifillojnë bisedimet së shpejti, pasi të zhvillojnë konsultime në kryeqytetet e tyre. Diskutime në nivel teknik do të mbahen javën e ardhshme në Vjenë, sipas Ministrit të Jashtëm të Omanit, Sayyid Badr Albusaidi.

Ai pritet të zhvillojë gjithashtu bisedime në Washington me zëvendëspresidentin amerikan JD Vance dhe zyrtarë të tjerë amerikanë.

Çdo përparim drejt një marrëveshjeje mes Washingtonit dhe Teheranit mund ta ulë rrezikun e një sulmi të mundshëm nga presidenti amerikan Donald Trump ndaj Iranit.

Një sulm i tillë shihet nga shumë vende si rrezik për një luftë më të gjerë në Lindjen e Mesme.

Bisedimet indirekte u zhvilluan në Gjenevë mes ministrit të Jashtëm të Iranit, Abbas Araqchi, dhe të dërguarve amerikanë Steve Witkoff dhe Jared Kushner. U mbajtën dy runde, një paradite dhe një pasdite.

Ministri i Omanit tha se është arritur “përparim i rëndësishëm”, por nuk dha detaje dhe nuk konfirmoi nëse janë zgjidhur çështjet kryesore që i ndajnë palët.

Araqchi deklaroi për median shtetërore iraniane se është arritur pajtueshmëri për disa çështje, ndërsa për disa të tjera ka ende mospajtime. Ai theksoi se Irani kërkon heqjen e sanksioneve amerikane. Nga ana tjetër, SHBA-ja ka kërkuar lëshime të mëdha nga 
Teherani para se të heqë sanksionet.

Nuk pati reagim të menjëhershëm nga ekipi amerikan i negociatave, por një zyrtar i lartë amerikan i cituar nga media tha se bisedimet në Gjenevë ishin pozitive.

Këto diskutime zhvillohen në një kohë tensionesh të larta në Lindjen e Mesme. 
Presidenti Trump ka paralajmëruar veprime nëse nuk arrihet marrëveshje, ndërsa ushtria amerikane ka shtuar praninë e saj pranë Iranit.