Bideni dhe Xi do të takohen të hënën në Indonezi

Presidenti i SHBA-së, Joe Biden, do të takohet të hënën me presidentin kinez, Xi Jinping në margjinat e Samitit të G20 që do të mbahet javën e ardhshme në Bal të Indonezisë.

Ky do të jetë një takim ballë për ballë mes dy liderëve, që vjen në mes të marrëdhënieve gjithnjë e më të tensionuara SHBA-Kinë, njoftoi Shtëpia e Bardhë të enjten, raportoi Associated Press.

Ky do të jetë takimi i parë personal midis liderëve të dy ekonomive më të mëdha në botë që kur Bideni u bë president në janar të vitit 2021, dhe vjen disa javë pasi Xi-t iu dha një mandat i tretë, pesëvjeçar, që thyen normat si udhëheqës i Partisë Komuniste Kineze gjatë kongresi kombëtar të partisë.

Sekretarja e shtypit e Shtëpisë së Bardhë, Karine Jean-Pierre tha në një deklaratë se liderët do të takohen për të "diskutuar përpjekjet për të ruajtur dhe thelluar linjat e komunikimit midis" dy vendeve dhe për "të menaxhuar me përgjegjësi konkurrencën dhe të punojmë së bashku aty ku përputhen interesat tona, veçanërisht në sfidat ndërkombëtare që prekin komunitetin ndërkombëtar”.

Shtëpia e Bardhë ka punuar me zyrtarë kinezë gjatë javëve të fundit për të organizuar takimin. Biden u tha gazetarëve të mërkurën se ai synonte të diskutonte me Xi tensionet në rritje midis Uashingtonit dhe Pekinit mbi ishullin e vetëqeverisur të Tajvanit, politikat tregtare, marrëdhëniet e Pekinit me Rusinë dhe më shumë.